एजेन्सी– कतारमा जारी फिफा विश्वकप फुटबल उपाधिका लागि अर्जेन्टिना र फ्रान्सबीच प्रतिस्पर्धा हुने भएको छ । २२ औं संस्करणको विश्वकपको दोस्रो सेमिफाइनलमा साविक विजेता फ्रान्सले मोरक्कोलाई २–० तथा पहिलो सेमिफाइनलमा अर्जेन्टिनाले क्रोएसियालाई ३–० ले हराउँदै फाइनलमा स्थान पक्का गरेको हो ।

फाइनल पुस ३ गते राती ८ः४५ बजे लुसेल आइकोनिक रंगशालामा हुनेछ । कतार विश्वकपमा यस पटक धेरै आश्चर्यजनक र अप्रत्याशित नतिजाहरु रहे । साना मानिएका टोलीले विश्व फुटबलमा राज गर्दै आएका टोलीलाई स्तब्ध पारे ।

चार पटकको च्याम्पियन जमर्नी पहिलो चरणबाटै बाहिरिनु पर्यो । एसियाका टोली जापान र साउदी अरेवियाले यस विश्वकपमा सनसनी मच्चाउन सफल भए ।

पोर्चुगल तथा वर्तमान समयका विश्व फुटबलका महान् खेलाडी क्रिष्टियानो रोनाल्डोको विश्वकप जित्ने सपना अधुरै रह्यो । फिफा विश्वकप २०२२ का पाँच अप्रत्याशित नतिजाहरु यस प्रकार छन् ।

५. ब्राजिल क्यामरुनसँग स्तब्ध

विश्वकपको सर्वाधिक सफल टोली ब्राजिल समूह जी को अन्तिम खेलमा क्यामरुनसँग १–० ले स्तब्ध हुन पुग्यो । विश्व वरियता शीर्ष स्थानमा रहेको ब्राजिल ४३ औं स्थानमा रहेको क्यामरुनसँग पराजित भएपनि समूह विजेता बन्दै अन्तिम १६ मा पुगेको थियो ।

निर्धारित ९० मिनेटमा दुबै टोलीबाट गोल हुन सकेको थिएन । थप गरेको दोस्रो मिनेटमै क्यामरुनका भिन्सेन्ट अबुबकारले गोल गर्दै जित दिलाएका थिए । तर क्यामरुन जितका बाबजुद अन्तिम १६ मा स्थान बनाउन सकेन ।

४.जापानसँग जर्मनी स्तब्ध

चार पटकको च्याम्पियन जर्मनीको समूह इ बाट तेस्रो स्थानमा रहँदै बाहिरिनु पर्यो । जर्मनी पहिलो खेलमै जापानसँग २–१ ले पराजित भएको थियो । त्यो हार जर्मनीको लागि सुपर १६ मा पुग्न बाधक बन्यो ।

३० औं मिनेटमा जर्मनीले पेनाल्टीको अवसर पाएको थियो । गुन्डोगनले पेनाल्टीमा गोलरक्षकलाई विपरित दिशामा पठाउँदै अग्रता दिलाएका थिए । ७५ औं मिनेटमा वैकल्पिक खेलाडीको रुपमा प्रवेश गरेका रित्सु डोआनले गोल गर्दै १–१ को बराबरीमा पुर्याए ।

८४ औं मिनेटमा ताकुमी असानोको गोल गरेपछि जापानले २–१ को अग्रता लिएको थियो । विश्व वरियतामा ११ औं स्थानमा रहेको जर्मनीलाई २४ औं स्थानमा रहेको जापानसँगको हारनै पहिलो चरणबाटै बाहिरिनुको कारण बन्यो ।

३. पोर्चुगल मोरक्कोसँग पराजित

रोनाल्डोको अन्तिम विश्वकपमा उपाधि जित्ने सपना मोरक्को बाधक बन्यो । रोनाल्डो आफ्नो विश्वकप उपाधि सपना साकार पार्न मात्रै तीन कदम टाढा थिए । तर क्वाटरफाइनल खेलमा पोर्चुगल मोरक्कोसँग १–० ले स्तब्ध हुँदै बाहिरिनु पर्यो ।

अल थुमामा रंगशालामा १–० को जित दर्ता गर्दै मोरक्को विश्वकपको सेमिफाइनमा प्रवेश गर्ने पहिलो अफ्रिकी राष्ट्र बन्दै इतिहास रचेको थियो । पोर्चुगलका प्रशिक्षक फर्नान्डो सान्तोसले कप्तान रोनाल्डोलाई पहिलो हाफमा बेन्चमा राखेका थिए । रोनाल्डोसँगको चिसो सम्बन्धको कारण बेन्चमा राख्ने निर्णय पोर्चुगललाई भारी परेको थियो ।

२. ब्राजिल क्रोएसियासँग पराजित

विश्वकपको सर्वाधिक सफल टोली ब्राजिल क्वाटरफाइनलमा टाइब्रेकरमा क्रोएसियासँग ४–२ ले पराजित हुँदै बाहिरियो । निर्धारित समयमा दुवै टोलीबाट गोल हुन सकेन । त्यसपछि थप गरेको ३० मिनेटमा दुवै टोलीले गोल गरेपछि १–१ को बराबरी अवस्थामा पुगेको थियो ।

ब्राजिलको लागि १ सय ६ औं मिनेटमा नेयमारले गोल गर्दै १–० को अग्रता दिलाएका थिए । तर १ सय १७ औं मिनेटमा क्रोएसियाका ब्रुनो पेट्कोभिचले गोल गरेपछि खेल पुनः बराबरीमा आएको थियो ।

टाइब्रेकरमा क्रोएसियाका निकोलस भ्लासिच, लोभ्रो माएर, लुका मोड्रीच र मिस्लाभ ओर्सिचले गोल गरे । तर ब्राजिलका रोड्रीगो र मार्किन्हसको गोल हुन नसकेपछि दक्षिण अमेरिकी टोली बाहिरिनु परेको थियो । यस विश्वकपको सबैभन्दा बलियो मानिएको ब्राजिल क्रोएसियासँग टाइब्रेकरमा पराजित हुँदै बाहिरिनु परेको थियो ।

१.अर्जेन्टिना साउदी अरेवियासँग पराजित

अर्जेन्टिना तेस्रो विश्वकप उपाधिदेखि एक कदम टाढा छ । लियोनल मेस्सीको कप्तानीमा रहेको अर्जेन्टिना पहिलो खेलमै साउदी अरेवियासँग २–१ ले स्तब्ध हुन पुगेको थियो । तर त्यसपछि पोल्यान्ड र मेक्सिकोलाई हराउँदै समूहको शीर्ष स्थानमा रहँदै अन्तिम १६ मा स्थान बनाएको थियो ।

लुसेल रंगशालामा पहिलो हाफको सुरुवातमै कप्तान लिओनेल मेस्सीले पेनाल्टीमा गोल गर्दै अर्जेन्टिनालाई अग्रता दिलाएका थिए । तर त्यसपछि भने अर्जेन्टिनाले खेलमा गोल गर्न सकेन । साउदी अरेवियाले उत्कृष्ट पूनरागमनका साथ दुई गोल गर्दै उपाधि दाबेदार अर्जेन्टिनालाई स्तब्ध पार्दै विश्व फुटबलमै तहल्का पिट्यो ।

दोस्रो हाफको सुरुवाती ४८ औं मिनेटमा सालेह अल सेहरीले सुन्दर फिनिस गर्दै खेल बराबरीमा ल्याएका थिए । बराबरी गरेको ५ मिनेटमै सालेम अल दसारी साउदीलाई अप्रत्याशित अग्रता दिलाए । समूह सी मा सबैभन्दा कमजोर मानिएको साउदी अरेवियासँग अजेन्टिनाको हारले विश्व फुटबलमै तहल्का पिट्यो । साउदी त्यसपछि विजयी हुन नसक्दा पुछारमा रहेर बाहिरिएको थियो ।