एजेन्सी – इंग्लिस प्रिमिर लिगको शीर्षस्थानमा रहेको आर्सनल बराबरीमा रोकिदा ब्राइटनले सानदार जित हात पारेको छ ।

मंगलबार राति भएको खेलमा आर्सनल घरेलु मैदानमा न्यूक्यासल युनाइटेडसँग गोलरहित बराबरीमा रोकिएको हो । घरेलु मैदान इमिरेट्स स्टेडियममा ६७ प्रतिशत बल पोसेसन राखेपनि आर्सनलले न्यूक्यासलको बलियो रक्षापङ्ति तोड्न नसक्दा बराबरीमा रोकिन बाध्य बन्यो ।

प्रिमियर लिगमा यो सिजन उच्च प्रदर्शन गरिरहेको आर्संनलको यो दोस्रो बराबरी हो । यसअघि आर्सनलले साउथह्याम्टनसँग १–१ गोलको बराबरी खेलेको थियो ।

यस बराबरीपछि दुई अंक गुमाएको आर्सनल १७ खेलबाट ४४ अंक जोडेर शीर्षस्थानमा यथावत रहेको छ । आर्सनलले दोस्रो स्थानमा रहेको म्यानचेस्टर सिटीलाई ८ अंकले पछि पारेको छ । सिटीले एक खेल कम खेलेको छ ।

आर्सनलले १७ खेलमा १४ जित, २ बराबरी र १ हारको नतिजा निकालेको छ । आर्सनलले यो सिजनको प्रिमियर लिगमा म्यानचेस्टर युनाइटेडसँग मात्रै हार बेहोरेको छ । सेप्टेम्वरमा आर्सनलले युनाइटेडलाई ३–१ ले नतिजा सुम्पिएको थियो । यस्तै यो सिजन उच्च प्रदर्शन गर्दै तेस्रो स्थानमा रहेको न्यूक्यासलको १८ खेलबाट ३५ अंक पुगेको छ ।

यता, अर्काे खेलमा ब्राइटनले एभर्टनलाई उसकै मैदानमा ४–१ को हार चखाएको छ । ब्राइटनको जितमा काओरु मितोमा, इभान फर्गुसन, सोलेी मार्स र पास्कल ग्रसले गोल गरे । एभर्टनका डिमाराई ग्रेले एक गोल फर्काए ।

गुडिसन पार्कमा ब्राइटनले खेलको १४औं मिनेटमा मितोमाको गोलबाट अग्रता लिएको थियो । उनेल मोसेस काइसेडोको पासमा गोल गर्न सफल भएका थिए ।दोस्रो हाफमा ७ मिनेटको अन्तरमा तीन गोल थप्दै ब्राइटनले सहज जित हात पार्न सफल भयो ।

५१औं मिनेटमा इभान फर्गुसनले गोल गर्दै ब्राइटनको अग्रता दोब्बर पारे । ५४औं मिनेटमा सोली मार्सले इभानको पासमा गोल गरेपछि ब्राइटनले खेलमा ३–० को अग्रता बनायो ।

५७औं मिनेटमा पास्कलले गोल गर्दै ब्राइटनलाई ४–० ले अघि बढाए । इन्ज्युरी समयको थप गरिएको दोस्रो मिनेटमा डिमाराई ग्रेले पेनाल्टीमा गोल गर्दै खेललाई ४–१ को स्थितिमा ल्याएपनि ब्राइटन विजयी हुन सफल भयो ।

यस जितसँगै ब्राइटन १७ खेलबाट २७ अंक जोडेर आठौं स्थानमा उक्लिएको छ । पराजित एभर्टन १५ अंक जोडेर १६औं स्थानमा छ ।

यस्तै अर्काे खेलमा फुलहमले लेस्टरलाई १–० ले पराजित गरेको छ । १७औं मिनेटमा एलेक्सान्डर मित्रोभिचले गरेको गोल नै फुलहमको जितमा पर्याीत बन्यो । यस जितसँगै फुलहम १८ खेलबाट २८ अंक जोडेर सातौं स्थानमा उक्लिएको छ । पराजित लेस्टर १७ अंक जोडेर १३औं स्थानमा छ ।