एजेन्सी – नर्वेली फरवार्ड एर्लिङ ब्राउट हालान्डको ह्याट्रिक सहयोगमा म्यानचेस्टर सिटीले इंग्लिस प्रिमियर लिगमा सहज जित हात पारेको छ ।

सिटीले घरेलु मैदानमा वल्भ्समाथि ३–० को सहज जित हात पारेको हो । सबै तीन गोल हालान्डले गरे । इतिहाद स्टेडियममा आइतबार राति भएको खेलमा घरेलु टोली सिटीले बल पोसेसन राख्दै पाहुना टोलीमाथि दवाव बढाउँदै ४०औं मिनेटमा अग्रता लिन सफल भएको थियो । उनले केभिन डि ब्रुएनाको पासमा गोल गर्न सफल भएका थिए ।

५०औं मिनेटमा हालान्डले पेनाल्टीमा व्यक्तिगत र टोलीका लागि दोस्रो गोल गर्दै सिटीको अग्रता दोब्बर पारे । इल्केए गुन्डोगानलाई रुवेन नेभेसले फउल गरेपछि रेफ्रीले सिटीलाई पेनाल्टी प्रदान गर्दा हालान्ड चुकेनन् ।

५४औं मिनेटमा हालान्डले ह्याट्रिक पूरा गरेपछि सिटीले खेलमा ३–० को आरामदायी अग्रता कायम गर्न सफल भयो । उनले रियाद महारेजको पासमा गोल गर्न सफल भए । प्रिमियर लिगमा हालान्डको यो १८औं खेलमा २५ गोल हो । उनले ३ असिस्ट पनि दिएका छन् । त्यसपछि थप गोल निस्कन नसक्दा सिटी विजयी हुन सफल भयो ।

यस जितसँगै सिटीले शीर्षस्थानको आर्सनलसँगको अंक दुरी २ मा छोट्याएको छ । दोस्रो स्थानमा रहेको सिटीको २० खेलबाट ४५ अंक पुगेको छ । २ खेल कम खेलेको आर्सनलको ४७ अंक छ । पराजित वल्भ्स १७ अंक जोडेर १७औं स्थानमा छ ।