एजेन्सी – स्पेनिस कोपा डेल रे अन्तर्गत क्वाटरफाइनलमा चरणमा रियल म्याड्रिड र एटलेटिको म्याड्रिड भिड्दैछन् । खेल नेपाली समय अनुसार विहीबार मध्यरात १:४५ बजे हुनेछ ।

यी दुई टोलीबीच गत सेप्टेम्बरमा भएको लिग भिडन्तमा रियल म्याड्रिडले २-१ को जित दर्ता गरेको थियो । उक्त खेलमा घरेलु मैदानमा हार बेहोरेको एटलेटिको आज रियलको मैदान सान्टियागो बर्नाबाउमा बदला लिने सुरमा हुनेछ । रियलले यसै महिना बार्सिलोनासँग सुपर कपमा हार बेहोरेको थियो । आजको खेलमा पराजित भए रियल अर्को उपाधिबाट बन्चित हुनेछ ।

कोपा डेल रे को अन्तिम १६ मा रियलले भिल्लारियललाई पराजित गरेको थियो । उक्त खेल रियल पहिलो हाफमा २-० ले पछि परेको थियो । रियलले सन् २०१३-१४ यता कोपा डेल रे जित्न सकेको छैन । प्रशिक्षक कार्लो एन्सेलोटि पछिल्लो ८ वर्षमा फाइनल पुग्न नसकेको खडेरी तोड्ने प्रयासमा हुनेछन् ।

घरेलु मैदानमा रियल म्याड्रिड यस सिजन खेलेको १० खेलमा अपराजित छ । तर टोलीले यसक्रममा मात्र एक खेलमा क्लिन सिट राखेको छ । एटलेटिकोविरुद्ध घरेलु मैदानमा खेलेको पछिल्लो ४ खेलमा टोलीले गोल नखाई जित हासिल गरेको छ ।

एटलेटिकोले कोपा डेल रे को अन्तिम १६ मा लेभान्तेलाई २-० ले पराजित गरेको थियो । लिगमा अपेक्षित प्रदर्शन गर्न नसकेको टोली यसपटक नकआउट प्रतियोगितामा उपाधि जित्ने प्रयासमा छ । तर यी दुई टोलीबीच पछिल्लो १३ प्रतिस्पर्धात्मक खेलमा रियल २ पटक मात्र पराजित भएको छ ।

खेलको पूर्वसन्ध्यामा एटलेटिकोका अल्ट्राज समर्थक समूहले रियल म्याड्रिडका ब्राजिलियन विंगर भिनिसियस जुनिअरलाई लक्षित गर्दै प्रदर्शन गरेका थिए । एटलेटिको आफैंले पनि आफ्नो समर्थक समूहको यस कदमको भर्त्सना गरेको छ ।