एजेन्सी – प्रशिक्षक रुडी गार्सियाले पोर्चुगिज फरवार्ड क्रिस्टियानो रोनाल्डोले पहिलो हाफमा पाएको अवसरमा गोल गर्न नसक्नु अल नासर साउदी सुपर कपको सेमिफाइनलमा पराजित हुनुको कारण रहेको बताएका छन् ।

विहीबार सम्पन्न सेमिफाइनलमा अल इतिहादसँग ३-१ ले पराजित भएपछि रोनाल्डोको नयाँ क्लबमा उपाधि जित्दै सुरुवात गर्ने लक्ष्य पूरा हुन सकेन । विजयी टोलीका लागि रोमारिन्हो, हम्दाल्लाह र मोहमद अलशान्कितिले गोल गरे । एन्डरसन टालिस्काको गोल निर्णय बदल्न पर्याप्त रहेन ।

खेलमा अधिकांश समय बलमा पकड जमाएपनि अल नासरले पाएको अवसर सदुपयोग गर्न सकेन । यता अल इतिहादले काउन्टर अट्याकमा लगातार समस्या सिर्जना गर्दै अल नासरको डिफेन्सलाई दवावमा राख्यो ।

१५ अ‍ौं मिनेटमा रोमारिन्होले गोल गर्दै इतिहादलाई अग्रता दिलाएका थिए । त्यसपछि रोनाल्डोले पाएको सुवर्ण अवसर खेर फाले । प्रशिक्षक गार्सियाले खेलपछि बोल्दै रोनाल्डोले उक्त अवसर सदुपयोग गरेको भए खेलको नतिजा फरक हुने अभिव्यक्ति दिए ।

‘खेलको रुप नै परिवर्तन भयो । यदि रोनाल्डोले त्यो अवसर सदुपयोग गरेको भए खेल हाम्रो पक्षमा पनि आउँथ्यो होला, गार्सियाले भने ।

रोनाल्डोको मिसपछि ४३ अ‍‍ौं मिनेटमा हम्दाल्लाहले गोल गर्दै इतिहादलाई पहिलो हाफमा २-० ले अघि बढाए । ६७ अ‍ौं मिनेटमा टालिस्काले गोल फर्काउँदै सम्भावना देखाएपनि इन्ज्युरी समयमा अलशान्कितिले इतिहादको जित सुनिश्चित गरे ।

यसपटक नयाँ नियम लागु भएका कारण अल नासरले सुपर कपमा प्रतिस्पर्धा गर्न पाएको थियो । विगतमा दुई टोली खेल्ने सुपर कपमा यसपटक चार टोली समेटिएका थिए । लिग र किंग्स कपको शीर्ष दुई टोली छनोट हुने व्यवस्था गरिएको हो । तर अल हिलाल लिग विजेता र कप उपविजेता रहेकाले लिगको तेस्रो अल नासरले अवसर पाएको थियो ।

विहीबार नै भएको अर्को सेमिफाइनलमा किंग्स कपको विजेता अल फाएहाले अल हिलाललाई १-० ले हरायो । सोमबार अल इतिहाद र अल फाएहाबिच फाइनल खेल हुनेछ ।