काठमाडौं (हाम्रो खेलकुद) – राष्ट्रिय फुटबल टोलीका फरवार्ड अन्जन विष्टले भारतको आइलिगमा डेब्यु गरेको खेलमा उनको टोली मुम्बई केन्क्रे फुटबल क्लबले हार बेहोरेको छ । आइतबार इएमएस कर्पोरेसन रंगशालामा गोकुलम केरालाले केन्क्रेलाई १-० ले हराएको हो ।
खेलको २१ औं मिनेटमा साविक विजेता केरालाका लागि सर्जियो मेन्डीगुत्सियाले गरेको गोल नै निर्णायक सावित भयो । उनले विकासको राइट विंगबाट आएको क्रसलाई हेडरमार्फत गोलमा परिणत गरेका थिए । खेलको दोस्रो हाफमा केराला १० खेलाडीमा समेटिएको थियो । तर अन्तिम आधा घण्टा एक खेलाडी बढी भएपनि केन्क्रे खेलमा फर्कन सकेन ।
अन्जनले केन्क्रेका लागि सुरुवाती रोजाइमा खेल्दै डेब्यु गरेका थिए । ६० औं मिनेटमा पापुइआको चिपमा अन्जनको डाइभिङ हेडरले पोस्टको दिशा लिन नसक्दा खेलमा केरालाको अग्रता कायम रहेको थियो ।
केन्क्रे यस हारसँगै लिगको रेलिगेसन क्षेत्रमा कायम रहेको छ । १२ टोली सहभागी लिगमा केन्क्रे १४ खेलमा १३ अंकसाथ ११ औं स्थानमा छ । पुछारको सुदेभा दिल्लीको ११ खेलमा २ तथा दशौं स्थानको नेरोका एफसीले १४ अंक जोडेको छ ।
अन्जनको टोलीले अब अर्को खेलमा नेपाली राष्ट्रिय टोलीका गोलरक्षक किरण चेम्जोङको सामना गर्नेछ । खेल बुधबार साँझ ७ बजे हुनेछ । किरणको टोली राउण्डग्लास पन्जाब फुटबल क्लब १३ खेलमा २९ अंकका साथ शीर्षस्थानमा छ ।
