एजेन्सी – अन्तिम समयमा सम्हालिन नसक्दा शीर्षस्थानमा रहेको पेरिस सेन्ट जर्मेन (पिएसजी) फ्रेन्च लिग वानमा बराबरीमा रोकिएको छ ।
१० खेलाडीमा समेटिएको पिएसजीले अग्रता जोगाउन नसक्दा रेइम्ससँग १–१ गोलको बराबरी खेल्दै अंक बाड्न बाध्य बनेको हो । घरेलु मैदान पार्क डेस प्रिन्सेसमा आइतबार राति भएको खेलमा घरेलु टोलीका लाजि नेयमारले गोल गर्दा रेइम्सका फोलारिन बालोगनले बराबरी गोल फर्काए ।
प्रतिस्पर्धात्मक खेलको पहिलो हाफ गोलरहित बराबरीमा सकिदा दुवै गोल दोस्रो हाफमा भएको थियो । ५१औं मिनेटमा नेयमारले गोल गर्दै पिएसजीलाई १–० को अग्रता दिलाए । उनले जुआन बर्नाटको पासमा गोल गर्न सफल भएका थिए ।
एक गोलले अग्रता लिएको पिएसजी ५९औं मिनेटमा १० खेलाडीमा समेटिन पुग्यो । दोस्रो हाफको शुरुमै भिटिन्हाको स्थानमा मैदान छिरेका मार्काे भेराट्टी सिँधै रातो कार्ड खाँदै मैदानबाट बाहिरिए ।
त्यसपछि आफ्नो धैर्यता गुमाएको पिएसजीले अन्तिम समयमा गोल खाँदै २ अंक गुमाउन बाध्य बन्यो । इन्ज्युरी समयको थप गरिएको छैटौं मिनेटमा फोलारिन बालोगनले गोल गर्दै रेइम्सलाई हारबाट जोगाए ।
यस बराबरीसँगै शीर्षस्थानमा यथावत रहेको पिएसजीको २० खेलबाट ४८ अंक छ । पिएसजी दोस्रो स्थानको लेन्सभन्दा ३ अंकले अघि छ । रेइम्स २६ अंक जोडेर ११औं स्थानमा छ ।
