एजेन्सी – प्रिमियर लिग क्लब न्यूक्यासल युनाइटेड ४७ वर्षपछि इएफएल अर्थात कारवाओ कपको फाइनलमा प्रवेश गरेको छ ।
प्रिमियर लिग प्रतिद्धन्द्धी साउथह्याम्टनलाई २–१ ले तथा समग्रमा ३–१ ले पराजित गर्दै न्यूक्यासल सन् १९७६ पछि फाइनलमा पुग्न सफल भएको हो । कुनै पनि प्रतियोगितामा भने न्यूक्यासल २४ वर्षपछि फाइनलमा पुगेको हो । त्यसबेला न्यूक्यासल फाइनलमा म्यानचेस्टर युनाइटेडसँग २–१ ले पराजित भएको थियो ।
न्यूक्यासल सन् १९९९ को एफए कपको फाइनलमा प्रवेश गरेको थियो । वेम्वलीमा भएको फाइनलमा न्यूक्यासल म्यानचेस्टर युनाइटेडसँग नै नै २–० ले पराजित हुँदै उपाधिविमुख बनेको थियो । त्यसयता न्यूक्यासल फाइनल पुग्न सकेको थिएन ।
सेन्ट जेम्स पार्क न्यूक्यासलमा मंगलबार राति भएको सेमिफाइनलको दोस्रो लेगमा १० खेलाडीमा समेटिएको न्यूक्यासलको जितमा सेन लङस्टाफले दुई गोल गरे । साउथह्याम्टनका चे एडाम्सले एक गोल फर्काए ।
एडी होवेको पुनरुत्थान टोलीले अब म्यानचेस्टर युनाइटेड वा नटिङहम फरेस्टसँग वेम्बलीमा उपाधिको लागि खेल्नेछ । न्यूक्यासल १९६९ को इन्टर सिटीज फेयर कप पछि आफ्नो पहिलो प्रमुख ट्रफी जित्ने प्रयासमा हुनेछ ।
सन् १९९९ को एफए कपको फाइनलमा न्यूक्यासल युनाइटेड वेम्वलीमै म्यानचेस्टर युनाइटेडसँग पराजित हुँदै उपाधिविमुख बनेको थियो ।
लङस्टाफले खेलको चौथो मिनेटमा नै काइरन ट्रिपिएरको पासमा गोलरक्षक गेभिन बाजुनुलाई बिट गर्दै गोल गर्न सफल भएका थिए । २१औं मिनेटमा लङस्टाफले अर्काे गोल गर्दै टोलीको अग्रता दोब्बर पारे । उनले मिगुइल अल्मिरोनको पासमा गोल गर्न सफल भएका थिए ।
२९औं मिनेटमा चे एडाम्सले गोल गर्दै साउथह्याम्टनलाई खेलमा फर्कने संकेत दिए । ८२औं मिनेटमा न्यूक्यासल १० खेलाडीमा समेटिन पुग्यो ।
तर, त्यसको फाइदा साउथह्याम्टनले उठाउन सकेन । ब्रुनो गुइमारेस भिएआरको सहायतामा सिधैं रातो कार्ड खाँदै मैदानबाट बाहिरिए । त्यसपछि दुवै टोलीबाट गोल निस्कन नसक्दा खेल न्यूक्यासलले आफ्नो पक्षमा पार्न सफल भयो ।
इएफएल अर्थात कारवाओ कपको अर्काे सेमिफाइनलमा आज (बुधबार) राति म्यानचेस्टर युनाइटेड र नटिङहम फरेस्टले खेल्दैछ । पहिलो लेगमा म्यानचेस्टर युनाइटेडले ३–० विजयी भएको छ ।
