लमजुङ (हाम्रो खेलकुद) – पुर्वी लमजुङको राइनास नगरपालिका वडा नम्वर ६ धमिलिकुवास्थित गौलीटार क्षेत्रीय खेल मैदानमा दोस्रो राइनास कप खुल्ला फुटबल प्रतियोगिता फागुन दोस्रो साता आयोजना हुने भएको छ ।
आयोजक गौलीटार क्षेत्रीय खेलमैदान समितीले पत्रकार सम्मेलन गरी दोस्रो संस्करणको राइनास कप फागुन १० गतेबाट हुने जानकारी गराएको छ । समितिका अध्यक्ष किरण श्रेष्ठले यसपाली कम्तीमा १६ टिमको सहभागिता रहेने बताएका छन् । गतवर्ष १२ टोलीले प्रतिस्पर्धा गरेका थिए ।
यसपाली पुरस्कार राशिमा बृद्धि भएको छ । यसपल्टको विजेताले २ लाख रुपैयाँसहित कप, मेडल र प्रमाणपत्र पाउनेछन् । उपविजेताले १ लाख रुपैयाँ, कप र मेडल प्रदान गरिनेछ ।
सेमिफाइनलमा पराजित हुने दुई टिमलाई समान २० हजार रुपैयाँ प्रदान गरिने आयोजकले जनाएको छ । सर्वोत्कृष्ट खेलाडी, उत्कृष्ट गोलरक्षक र सर्वाधिक गोलकर्तालाई समान ५ हजार रुपैयाँ तथा हरेक खेलको म्यान अफ दि म्याचलाई १ हजार रुपैयाँ प्रदान गरिनेछ । पहिलो संस्करणमा चक्रतीर्थ युवा क्लब सातविसे लमजुङ पहिलो भएको थियो ।
यसवर्षको प्रतियोगिता सञ्चालनका लागि १५ लाख ४५ हजार रुपैयाँ खर्च हुने आयोजकको अनुमान छ । प्रथम राइनास कपमा ८ लाख विनियोजन गरेको राइनास नगरपालिकाले यसवर्ष पनि प्रतियोगिताको लागि ८ लाख रुपैया दिने निर्णय गरिसकेको जानकारी गराउदै अध्यक्ष श्रेष्ठले फुटबल प्रतियोगितालाई राइनासकै मेलाको रुपमा अघि बढाउने बताए ।
