एजेन्सी – स्टार फरवार्ड केलियन एमबाप्पेले चोट बोकेको खेलमा फ्रेन्च लिग वानको शीर्षस्थानमा रहेको पेरिस सेन्ट जर्मेन (पिएसजी) ले मोन्टपेलिएरलाई पराजित गरेको छ ।
पिएसजीले घरेलु टोलीमाथि ३–१ को जित निकाल्दै आफ्नो शीर्षतालाई थप मजवुत बनाएको हो । पिएसजीको जितमा फावियन रुइज, लियोनेल मेस्सी र वारेन जाइरी एमेरीले गोल गरे । मोन्टपोलिएरका एर्नाअड नोर्दिनले एक गोल फर्काए ।
मोन्टपेलिएरमा बुधबार राति भएको खेलको नवौं मिनेटमा पाहुना टोली पिएसजीले पेनाल्टी पाएपनि सदुपयोग गर्न सकेन ।केलियन एमबाप्पेले सुरुवाती पेनाल्टी चुकाए । पुनः प्रदान गरिएको पेनाल्टीमा पनि एमबाप्पेले गोल गर्न सकेन ।
२१औं मिनेटमा एमबाप्पेले चोट बोक्दै मैदान छाड्नुपरेको थियो । उनको स्थान ह्युगो इटिकेले लिएका थिए । ३५औं मिनेटमा पिएसजीका किकिले गोल गरेपनि भिएआरबाट मान्यता नपाउँदा पिएसजी अग्रता लिनबाट चुक्यो ।
५२औं मिनेटमा पिएसजीले अर्काे गोलले मान्यता पाएन । अचरफ हाकिमीले गोल गरेपनि उनी भिएआरमा अफसाइड ठहरिए । ५५औं मिनेटमा फावियन रुइजले गोल गर्दै पिएसजीलाई १–० को अग्रता दिलाए । उनले ह्युगो इटिकेको पासलाई सदुपयोग गरे ।
७२औं मिनेटमा फावियन रुइजको पासमा मेस्सीले गोल गर्दै पिएसजीको अग्रता दोब्बर पारे । ८९औं मिनेटमा एर्नाअड नोर्दिनले गोल गर्दै खेललाई २–१ को स्थितिमा ल्याए । उनले स्टेफी माभिडिडिको पासमा गोल गर्न सफल भएका थिए ।
त्यसपछि इन्ज्युरी समयको थप गरिएको दोस्रो मिनेटमा परिवर्तित खेलाडी वारेन जाइरी एमेरीले अचरफ हाकिमीको पासमा गोल गर्दै पिएसजीलाई सहज जित दिलाए ।
यस जितसँगै शीर्षस्थानमा रहेको पिएसजीको २१ खेलबाट ५१ अंक पुगेको छ । पिएसजीले दोस्रो स्थानको मार्सेलाई ५ अंकले पछि पारेको छ । पराजित मोन्टपेलिएर २० अंक जोडेर १४औं स्थानमा छ ।
