एजेन्सी – जर्मन बुन्डेसलिगाको शीर्षस्थानमा रहेको बायर्न म्युनिख डिएफवी पोकलको क्वाटरफाइनलमा प्रवेश गरेको छ ।
बायर्नले १० खेलाडीमा समेटिएको मेइन्जलाई ४–० ले पराजित गर्दै अन्तिम आठमा स्थान पक्का गरेको हो । बायर्नको फराकिलो जितमा एरिक म्याक्सिम चुपो मोटिङ, जमल मुसिएला, लिरोए साने र अलफन्सो डाभिसले गोल गरे ।
ओपेल एरिना मेइन्जमा बुधबार राति भएको एकपक्षीय खेलमा बायर्नले खेलको १७औं मिनेटमा चुपो मोटिङको गोलबाट अग्रता लिएको थियो । उनले जोआओ क्यान्सेलोको पासमा गोल गर्न सफल भएका थिए ।
३०औं मिनेटमा जमल मुसिएलाले थोमस मुलरको पासमा गोल गर्दै टोलीको अग्रता दोब्बर पारे । ४४औं मिनेटमा लिरोए सानेले गोल गरेपछि बायर्न पहिलो हाफमा ३–० ले अघि बढ्यो । सानेले चुपो मोटिङको पासमा गोल गर्न सफल भएका थिए ।
८२औं मिनेटमा मेइन्जका प्रशिक्षक सिधै रातो कार्ड खाँदै टचलाइन छोड्न बाध्य भए । ८३औं मिनेटमा अलफन्सो डाभिसले गोल गर्दै टोलीलाई ४–० ले अघि बढाए । उनले जोसुवा किम्मिखको पासलाई सदुपयोग गरेका थिए ।
८६औं मिनेटमा मेइन्ज १० खेलाडीमा समेटिन पुग्यो । एलेक्सान्डर ह्याक दोहोरो पहेलो कार्ड खाँदै मैदानबाट बाहिरिए । त्यसपछि थप गोल निस्कन नसक्दा बायर्न विजयी हुन सफल भयो ।
अर्काे प्रि–क्वाटरफाइनलमा आरबी लाइप्जिगले होफेनहाइनलाई ३–१ ले पराजित गरेको छ । लाइप्जिगको जितमा इमिल फोर्सवर्ग, कोनराड लेइमार र टिमो वेर्नरले गोल गरे । होफेनहाइनका कास्पर डोलवर्गर्ल एक गोल फर्काए ।
