काठमाडौं (हाम्रो खेलकुद) – साफ यू २० महिला च्याम्पियनसिपमा सफल नतिजाका लागि आफूहरुले निकै मेहनत गर्नुपर्ने नेपाली टोलीकी कप्तान प्रिती राईले बताएकी छिन् ।
बंगलादेशमा च्याम्पियनसिप सुरु हुनु अघिल्लो दिन बिहीबार प्रि म्याच कन्फ्रेन्समा बोल्दै प्रितीले भनिन्,‘ हाम्रो तयारी ठिकै छ। आयोजक बंगलादेशलाई घरेलु मैदानमा फाइदा छ । भर्खरलै यू १७ विश्व कप खेलेको अनुभव छ । त्यस्तै भुटानले पछिल्ला वर्षहरुमा प्रगती गरेको छ । त्यसैले सुखद नतिजाका लागि मेहनत गर्नुपर्नेछ ।’
बंगलादेशविरुद्ध खेल्दै नेपालले च्याम्पियसिपको सुरुवात गर्ने । भारत र भुटान पनि च्याम्पियनसिपमा सहभागी रहेका छन् । नेपाली टोलीका प्रशिक्षक यामप्रसाद गुरुङले तयारी सन्तोषजनक रहेको बताएका छन् । ‘सहभागी चारै टोलीको समानस्तर र प्रतिस्पर्धात्मक छन् । बंगलादेशलाई घरेलु मैदामा फाइदा हुन सक्छ,’ उनले भने,‘ हामीलाई विश्वास छ हामी राम्रो टक्कर दिनेछौं र उच्च प्रदर्श नगर्नेछौं ।’ नेपालले दोस्रो खेल भुटानविरुद्ध माघ २२ गते र भारतविरुद्ध माघ २४ गते खेल्नेछ ।
नेपालको खेल
माघ २० गते विरुद्ध बंगलादेश
माघ २२ गते विरुद्ध भुटान
माघ २४ गते विरुद्ध भारत
यू २० महिला टोली
गोलकिपर – कविता विक, सावित्री किसान र लिला जोशी
डिफेन्डर – सबिना चौधरी, सजनी थोकर, सरु हमाल, सुनिता भोलान, दिव्या यस्माली मगर, प्रतिक्षा चौधरी र कुमारी तामाङ
मिडफिल्डर – तुलसा बोहरा, कुसुम खतिवडा,सारा बज्राचार्य, सुनकला राई, मनमाया दमाई, प्रीति राई (कप्तान), अञ्जली मचामसी, सरस्वती हमाल र दीपा शाही
फरवार्ड – गरिमा राई, अमिषा कार्की, ममता पुन र अञ्जली चन्द
