एजेन्सी – विश्व उपविजेता फ्रान्स तथा इंग्लिस क्लब म्यानचेस्टर युनाइटेडका सेन्टरब्याक राफयल भारानले अन्तर्राष्ट्रिय फुटबलबाट सन्यासको घोषणा गरेका छन् ।
घरेलु र अन्तर्राष्ट्रिय फुटबलको व्यस्त तालिकाले असर पारेको र परिवारसँग बढीभन्दा बढी समय बिताउने भन्दै २९ वर्षीय भरनाले अन्तर्राष्ट्रिय फुटबलबाट बिदा लिने निर्णय गरेका हुन् । २९ वर्षीय भरानले विश्वकै उत्कृष्टमध्येका डिफेन्डरमा गनिन्छन् ।
‘एक दशकसम्म देशको प्रतिनिधित्व गर्नु मेरो जीवनको सबैभन्दा ठूलो सम्मान हो ।’ सन्यासको घोषणा गर्दै भरानले भने, ‘हरेकपल्ट मैले यो धेरै विशेष निलो जर्सी लगाएको छु, मैले धेरै गर्व महसुस गरेको छु । मैले धेरै महिनादेखि यसबारे सोचिरहेको थिए । र यो मेरो लागि अन्तर्राष्ट्रिय रूपमा सन्यास लिने सही समय हो भनेर निर्णय गरेको छु ।’ ‘म यसलाई कहिल्यै बिर्सने छैन । म अझै पनि त्यो दिन, १५ जुलाई २०१८ लाई बिर्सन सकिदैन । मेरो जीवनको सबैभन्दा अचम्मको र अविस्मरणीय क्षणहरू मध्ये एक थियो ।’ भरानले भने ।
लोरिसको सन्याससँगै फ्रान्स फुटबल फेडेरेसनले भारानेलाई कप्तानी दिने तयारी गरेको थियो । भरानले पनि सन्यास लिएपछि फ्रान्सले अर्काे विकल्प खोज्नेछ । अगस्ट २०२१ मा स्पेनिस क्लब रियल म्याड्रिडबाट युनाइटेडका लागि अनुबन्धित भएका भरान विश्वकपपछि सन्यास लिने फ्रान्सका दोस्रो खेलाडी हुन् ।
जनवरीमा, टोटेनहमका गोलरक्षक तथा कप्तान ह्युगो लोरिसले विश्वकप सकिएको तीन सातापछि सन्यास लिएका थिए । फ्रान्सका प्रशिक्षक डिडिएर डेसच्याम्पसले विश्वकपसम्म राष्ट्रिय टोलीसँग गर्न सक्ने सबै कुरालाई ध्यानमा राख्दै उनको निर्णयको सम्मान गर्ने बताएका छन् ।
सन् २०१८ को विश्वकप जितेका भरानले सन् २०१३ मा डेब्यु गरेपछि आफ्नो देशका लागि ९३ खेलमा ५ अन्तर्राष्ट्रिय गोल गरेका छन् ।
