एजेन्सी – स्पेनिस ला लिगाको शीर्षस्थानमा रहेको क्याटलान क्लब बार्सिलोनाले सहज जित दर्ता गरेको छ । घरेलु मैदानमा क्याडिजलाई २–० ले पराजित गर्दै बार्सिलोनाले शीर्षस्थानमा ८ अंकको स्पष्ट अग्रता बनाउँदै उपाधि जित्ने सम्भावना बलियो बनाएको छ ।

स्पोटिफाई क्याम्प नोउमा आइतबार राति भएको खेलमा बार्सिलोनाको जितमा सर्जी रोबर्टाे र रोबर्ट लेवान्डोस्कीले गोल गरे । दुवै गोल पहिलो हाफको अन्त्यतिर भएको थियो ।

हुना टोलीलाई खेलको सुरुवातदेखि नै दवावमा राखेको बार्सिलोनाले गोलको लागि भने पहिलो हाफको अन्तिम समय नै कुर्नुपरेको थियो ।

४३औं मिनेटमा सर्जी रोबर्टाेले गोल गर्दै बार्सिलोनालाई १–० को अग्रता दिलाए । रोबर्ट लेवान्डोस्कीको प्रहारलाई डिफेन्डर इसाक कार्सिलेनले ब्लक गरेपनि रिवाउन्डमा सर्जी गोल गर्न सफल भएका थिए ।

पहिलो हाफको इन्ज्युरी समयको थप गरिएको पहिलो मिनेटमा रोबर्ट लेवान्डोस्कीले सर्जी रोबर्टाेको पासमा गोल गर्दै बार्सिलोनाको अग्रता दोब्बर पारे ।

दोस्रो हाफमा पनि बार्सिलोनाले बल पोसेसन राख्दै दवा सिर्जना गरेपनि थप गोल निस्कन नसक्दा पहिलो हाफको गोल नै निर्णायक बन्यो ।

यस जितसँगै शीर्षस्थानमा रहेको बार्सिलोनाले दोस्रो स्थानमा रहेको रियल म्याड्रिडलाई ८ अंकले पछि पारेको छ । बार्सिलोनाको २२ खेलबाट ५९ अंक पुगेको छ । समान खेलबाटै रियलको ५१ अंक छ । पराजित क्याडिज २२ अंक जोडेर १७औं स्थानमा छ ।

अर्काे खेलमा एट्लेटिको म्याड्रिडले एथलेटिको बिल्वाओलाई १–० ले पराजित गरेको छ । एट्लेटिकोको जितमा ७३औं मिनेटमा एन्टोइन ग्रिजमनले गरेको गोल नै निर्णायक बन्यो ।

यस जितसँगै एट्लेटिको २२ खेलबाट ४१ अंक जोडेर चौथो स्थानमा रहेको छ । पराजित विल्वाओ ३२ अंक जोडेर सातौं स्थानमा छ ।