एजेन्सी – जर्मन बुन्डेसलिगामा बोरुसिया डर्टमुन्डले सानदार जित दर्ता गर्दै शीर्षस्थानको बायर्न म्युनिखसँग अंक बराबरी गर्न सफल भएको छ ।

डर्टमुन्डले घरेलु मैदानमा हर्था बर्लिनलाई ४–१ ले पराजित गर्दै शीर्षस्थानको बायर्नसँग अंक बराबरी गर्न सफल भएको हो ।सिग्नल इडुना पार्कमा आइतबार राति भएको खेलमा डर्टमुन्डको जितमा करिम एडियमी, डोनेल मालेन, कप्तान मार्काे रिउस र जुलियन ब्रान्डले गोल गरे । हर्थाका लुकास टोउसार्टले एक गोल फर्काए ।

२७औं मिनेटमा करिम एडियमीले गोल गर्दै डर्टमुन्डलाई १–० को अग्रता दिलाए । उनले कप्तान मार्काे रिउसको पासमा गोल गर्न सफल भएका थिए । ३२औं मिनेटमा करिम एडियमीको पासमा डोनेल मालेनलाई गोल गर्दै डर्टमुन्डलाई पहिलो हाफमा २–० को अग्रता दिलाए ।

४७औं मिनेटमा डर्टमुन्डले गोल खान पुग्यो । लुकास टोउसार्टले सुआट सेर्दारको पासलाई सदुपयोग गरेपछि हर्थालाई खेलमा फर्कने संकेत दिए । तर, ७६औं मिनेटमा कप्तान मार्काे रिउसले फ्रिकिमा सिधै गोल गर्दै डर्टमुन्डलाई जिततर्फ अग्रसर गराए । त्यसपछि ९०औं मिनेटमा जुुलियन ब्रान्डले गोल गर्दै डर्टमुन्डको सानदार जित पक्का गरे ।

यस जितसँगै दोस्रो स्थानमा उक्लिएको डर्टमुन्डको २१ खेलबाट ४३ अंक पुगेको छ । समान अंक रहेपनि बायर्न म्युनिख गोल अन्तरमा शीर्षस्थानमा रहँदा युनियन बर्लिन पछि छ । पराजित हर्था १७ अंक जोडेर १७औं स्थानमा छ ।