काठमाडौं (हाम्रो खेलकुद)– रोजगारीको सिलसिलामा कतार बस्दै आएका चितवनका टेकप्रसाद गोतामेले राष्ट्रिय महिला फुटबल टोलीका केहि खेलाडीलाई फुटबल बुट हस्तान्तरण गरेका छन् । दशरथ रंगशालामा सोमबार गोतामेले ११ महिला खेलाडीलाई बुट हस्तान्तरण गरेका हुन् ।

भदौमा काठमाडौंमा आयोजना भएको साफ च्याम्पिनसिपको उपाधि जितेको भए आफूले २ लाख रुपैयाँ टोलीलाई दिने घोषणा गरेको जनाउँदै गोतामेले उपाधि जितेको भए वचन अनुसार गर्थे । तर पनि केहि खेलाडीलाई बुट दिने सोच बनाए । अहिले स्वदेश आएको समय पारेर हस्तान्तरण गरे । साफ च्याम्पिनसिपको फाइनलमा नेपाल बंगलादेशसँग पराजित भएको थियो ।

नेपाली सेनामा रहँदा आफू तेक्वान्दो खेलाडीका रुपमा रहेका गोतामे १३ वर्षदेखि रोजगारीका क्रममा कतारमा रहेका छन् । राष्ट्रिय टोलीकी कप्तान एन्जिला तुम्बापो सुब्बाले टोलीकातर्फबाट धन्यवाद दिदै भनिन्,‘ यो हौसलाका लागि धन्यवाद दिदै राम्रो प्रदर्शनका लागि मनोबल बढाउन मद्दत पुग्छ ।’

फरवार्ड सावित्रा भण्डारी सम्बाले आफू उपचारका लागि कतार जाँदा गोतामेलगायत त्यहाँ रहेका नेपालले सहयोग गरेको स्मरण गर्दै खेलाडीलाई हौसला बढाउने भूमिका खेल्ने सबैलाई धन्यवाद दिइन् । हस्तान्तर कार्यक्रममा महिला फुटबल संघकी तथा एन्फा केन्द्रिय सदस्य पेमा डोल्मा लामाले खेलाडीको हौसला बढाएकोमा धन्यवाद दिदै भविष्यमा टोलीबाट सबै खेलाडीलाई सहयोगका लागि आग्रह गरिन् ।

राष्ट्रिय खेलकुद परिषद्की फुटबलकी मुख्य प्रशिक्षक अरुणा गुरुङले पनि सहयोगका लागि गोतामेलाई धन्यवाद दिइन् । भारतविरुद्ध दुई मैत्रीपूर्ण खेल खेलेर महिला टोली आइतबार स्वदेश फर्केको थियो । पहिलो खेल २–२ र दोस्रो खेल गोलरहित बराबरीमा टुंगिएको थियो ।