दिपक न्यौपाने, बुटवल

फ्रेन्ड्स क्लब २२ औ तिलोत्तमा गोल्डकप फुटबल प्रतियोगिताको सेमिफाइनलमा प्रवेश गरेको छ । बुटवलमा जारी प्रतियोगितामा सोमबार अर्को ए डिभिजन टोली एपिएफ फुटबल क्लबलाई २–१ ले पराजित गर्दै फ्रेन्ड्स अन्तिम चारमा प्रवेश गरेको हो ।

२०५८ सालको १५ औं संस्करणको विजेता समेत रहेको फ्रेन्ड्स त्यसयता पहिलो पटक सेमिफाइनल पुगेको हो । सोमबार फ्रेन्ड्सका डोना थापा र राफियो एमोनीले गोल गरे । एपिएफका लागि प्रविण स्याङ्तानले गोल गरे ।

गृह जिल्लामा कप्तानी समेत सम्हालेका डोनाले ५२ औं मिनेटमा पहिलो गोल गरे । परिवर्तित खेलाडी एरोन थापाको पासमा एमोनीले ८२ औं मिनेटमा गोल थप्दै अग्रतालाई दोब्बर बनाए । इन्जुरी समयको दोस्रो मिनेटमा एपिएफका प्रविणले हेडमार्फत गोल गरेपनि एपिएफ खेलमा फर्कन सकेन ।

फ्रेन्ड्सका उत्तम राईले पाँचौ. मिनेटमा गोलको मौका खेर फाले । अमिनोले पेनाल्टी बक्स नजिकबाट गरेको फितलो प्रहार सफल हुन सकेन । पहिलो हाफको अन्तिम समयमा एपिएफका प्रविणको प्रहार फ्रेन्ड्सका गोलपिकर विशाल सुनारले रोके । दोस्रो हाफमा सुधारिएको प्रदर्शन गर्दै फ्रेन्ड्सले अग्रता बनाएको थियो । फ्रेन्ड्सका एमोनी म्यान अफ दी म्याच घोषित भए र उनले ११ हजार रुपैयाँ प्राप्त गरे ।

एपिएफका प्रशिक्षक सुदीप श्रेष्ठले जुनियर र सिनियर खेलाडीको तालमेल मिल्न नसक्दा पराजय भोग्न परेको बताए । फ्रेन्ड्सका प्रशिक्षक उर्जेन श्रेष्ठले लामो यात्राको थकान हुन्दा पनि खेलाडीले उत्च प्रदर्शन गरेर सफलता मिलेको बताएका छन् ।

तिलोत्तमाको उपाधि चार पटक जितेको नेपाल पुलिस क्लबले मंगलबार मनाङ मस्र्याङ्दी क्लबको सामना गर्नेछ । मनाङले अहिले सम्म तिलोत्तमा जित्न सकेको छैन । तिलोत्तमा गोल्डकपको विजेताले उपाधिसहित ११ लाख ११ हजार १ सय ११ तथा दोस्रो हुने टोलीले ५ लाख ५५ हजार ५ सय ५५ रुपैयाँ प्राप्त गर्नेछ । प्रतियोगिताका सर्वोत्कृष्ट खेलाडीले मोटरसाइकल तथा विधागत उत्कृष्ट खेलाडीले समान ३० हजार रुपैयाँ प्राप्त गर्नेछन् ।

९३ बर्षीय थापाको उत्साह

चार वर्षपछि तिलोत्तमा गोल्डकप फुटबल प्रतियोगिता आयोजना हुँदा दर्शकको उपस्थिति पनि बाक्लो हुँदै जान थालेको छ । यस क्रममा सोमबारको दृश्य रोचक थियो । ९३ बर्षीय भक्ति थापा दर्शकमध्येकी एक थिइन् ।

उनी आफ्ना दुई नाती डोना थापा र एरोन थापाको खेल हेर्न र उनीहरुको टोलीको हौसला बढाउन देविनगरस्थित एन्फा टेक्निकल सेन्टर पुगेकी थिइन् । आराम गर्नुपर्ने उमेरमा पनि नाती सम्मलित टोलीको हौसला बढाउने क्रममा थापाले हुटिङ गरेको दृश्य लोभलाग्दो थियो । टोलीका लागि नातीले पहिलो गोल गरेपछि उनी उभिएर लगातार ताली बजाई रहिन् ।

रुपन्देही सैनामैना निवासी थापाको परिवार फृुटबलमा समर्पित रहेको छ । ‘म पहिला देखि नै फुटबललाई माया गर्थे । मेरो छोरा एन्ड्रु थापा पनि फुटबल खेलाडी थियो,’ थापाले भनिन्, यस्ता फुटबल प्रतियोगितामा स्थानिय खेलाडीलाई पनि समेट्नुपर्छ ।’