काठमाडौं (हाम्रो खेलकुद) – नेपाली राष्ट्रिय फुटबल टोलीले प्रधानमन्त्री थ्री नेसन्स कप अन्तर्गत बुधबार लाओसविरुद्ध समूह चरणको पहिलो खेल खेल्दैछ । खेल नेपाली समयअनुसार साँझ ६ बजे दशरथ रंगशालामा सुरु हुनेछ ।

प्रतियोगिताका लागि नवनियुक्त प्रशिक्षक भिन्सेन्जो अल्बर्टो अनेसेले ६ नयाँ खेलाडी समेट्दै २३ सदस्यीय टोलीको घोषणा गरिसकेका छन् । ए डिभिजन लिगको आधारमा टोली छनोट गरेका उनले लामो समय राष्ट्रिय टोलीबाट बाहिर रहेका केहि खेलाडीलाई पनि पुनरागमनको अवसर दिएका छन् । बुधबार लाओसविरुद्ध अनेसेले अनुभवी खेलाडीलाई प्राथमिकतामा राख्दै सुरुवाती ११ घोषणा गर्ने सम्भावना छ ।

प्रशिक्षक अनेसेले गत साता पत्रकार सम्मेलनमा बोल्दै चरणवद्ध रुपमा आफ्नो योजना अनुसार नयाँ खेलाडी समावेश गर्ने बताएका थिए । उनले एकैपटक परिवर्तन गर्न खोज्दा नतिजा राम्रो आउन नसक्ने भन्दै नयाँ र पुराना खेलाडीको सन्तुलन कायम राख्ने बताएका थिए । त्यसअनुसार आज लाओसविरुद्ध अनुभवी खेलाडी नै पहिलो रोजाइमा पर्ने देखिन्छ । अनेसेले आफ्नो पुरानो क्लबमा विशेषत ४-३-३ को रणनीतिमा खेलाउने गरेको र नेपाली टोली पनि त्यसमा अभ्यस्त छ । यसबाहेक प्रशिक्षकले व्यक्तिगत अपेक्षा अनुसार खेलाडी प्रयोग गर्न सक्छन् ।

गोलरक्षकमा कप्तान किरण चेम्जोङको स्थान पक्का छ । गत साता मात्र भारतीय लिगमा सर्वोत्कृष्ट खेलाडी चुनिएका किरण नेपालका लागि सर्वाधिक खेल खेल्ने खेलाडी पनि हुन् । उच्च लयमा रहेका किरणपछि दीप कार्की र अभिषेक बराल ब्याकअपको रुपमा रहनेछन् ।

डिफेन्समा अनन्त तामाङ र रोहित चन्दको जोडी नै निरन्तर हुने देखिन्छ । कुनै समय राष्ट्रिय टोलीमा पनि डिफेन्सिभ मिडफिल्डमा खेलेका रोहित पछिल्लो समय भने अनन्तसँग डिफेन्समा जमेका छन् । प्रशिक्षक अनेसेले टोलीको आवश्यकता देखेर रोहितलाई मिडफिल्डमा खेलाउँदा भने आदित्य चौधरी र विकास खवास विकल्पको रुपमा रहनेछन् । युवा डिफेन्डर पदम भट्टराई पनि पहिलो पटक टोलीमा पर्दा केहि मिनेटको अपेक्षा गरिरहेको हुनेछन् ।

विंगब्याकतर्फ नेपालले सनिश श्रेष्ठलाई राइट ब्याकमा खेलाउने प्रबल सम्भावना छ । लिगमा एपिएफका लागि उच्च प्रदर्शन गर्दै आएका उनीबाहेक टोलीमा प्राकृतिक राइट ब्याक छैनन् । विकास खवास डिफेन्सको सबै क्षेत्रमा खेल्न सक्ने भएकाले उनको भूमिका पनि महत्त्वपूर्ण रहनेछ । लेफ्ट ब्याकमा निशान खड्काको सम्भावना छ ।

सेन्टर मिडफिल्डमा पुजन उपरकोटीले रक्षात्मक भूमिका निर्वाह गर्ने सम्भावना छ । यसबाहेक एरिक विष्टलाई मणि लामाले सेन्टर मिडफिल्डमा साथ दिन सक्छन् । लिगमा बक्स टु बक्स भूमिकामा जमेका यी दुईलाई कमल थापा र नविन लामाले पनि सुरुवाती स्थानका लागि चुनौती दिनेछन् । सुमित श्रेष्ठ खेलको अवस्था अनुसार फरक पोजिसनमा खेल्न सक्ने भएकाले वैकल्पिक खेलाडीको रुपमा उत्रन सक्छन् ।

प्रशिक्षक अनेसेले फरवार्ड अन्जन विष्ट खेलका लागि उपलब्ध हुने पक्का गरेका छन् । अन्तर्राष्ट्रिय फुटबलमा लगातार गोल गर्दै आएका उनले राइट विंग सम्हाल्ने देखिन्छ । आक्रमणमा अन्जनलाई नवयुग श्रेष्ठसँगै आशिष चौधरी र आयुष घलानमध्य एकले साथ दिने सम्भावना छ । नवयुग राष्ट्रिय टोलीका लागि घरेलु मैदानमा पहिलो गोल गर्ने लक्ष्यसहित मैदानमा हुनेछन् ।

आशिषले चर्च ब्वाइजका लागि लिगमा लेफ्ट विंगबाट आफ्नो गतिका साथ प्रभाव जमाएका छन् । त्यस्तै प्राविधिक रुपमा निपुण आयुष पनि लेफ्ट विंग पोजिसनका दावेदार हुन् । मनिष डाँगी र दीपक राज सिंह ठकुरीले पनि खेल बढ्दै जाँदा आफ्नो गति प्रयोग गर्न सक्छन् ।

सम्भावित सुरुवाती ११ :

किरण चेम्जोङ

सनिश श्रेष्ठ – अनन्त तामाङ – रोहित चन्द – निशान खड्का

पुजन उपरकोटी

एरिक विष्ट – मणि लामा

अन्जन विष्ट – नवयुग श्रेष्ठ – आयुष घलान

थ्री नेसन्स कपका लागि पूर्ण टोली :

गोलरक्षक (३) – किरण चेम्जोङ (राउन्ड ग्लास पन्जाब, भारत), दीप कार्की (मनाङ), अभिषेक बराल (सातदोबाटो)

डिफेन्डर (७) – रोहित चन्द (प्रेसिक केडिरी, इन्डोनेसिया ), अनन्त तामाङ (चर्च ब्वाइज), आदित्य चौधरी (जावलाखेल), विकास खवास (आर्मी), सनिश श्रेष्ठ (एपिएफ), निशान खड्का (संकटा), पदम भट्टराई (खुमलटार)

मिडफिल्डर (८) – मणि लामा (एपिएफ), नविन लामा (एपिएफ), पुजन उपरकोटी (मछिन्द्र), एरिक विष्ट (चर्च ब्वाइज) , कमल थापा (मनाङ) , आशिष चौधरी (चर्च ब्वाइज), आयुष घलान (संकटा) र सुमित श्रेष्ठ (मनाङ)

फरवार्ड (५) – दीपक राज सिंह ठकुरी (सातदोबाटो), मनिष डाँगी (संकटा), नवयुग श्रेष्ठ (आर्मी), भरत खवास (आर्मी) र अन्जन विष्ट (चर्च ब्वाइज)

यो पनि : को हुन् फुटबल टोलीमा परेका ६ नयाँ खेलाडी?