काठमाडौं (हाम्रो खेलकुद) – नेपाली राष्ट्रिय फुटबल टोलीले प्रधानमन्त्री थ्री नेसन्स कपको पहिलो खेलमा बुधबार लाओसको सामना गर्दैछ । खेल साँझ ६ बजे दशरथ रंगशालामा सुरु हुनेछ ।

नेपाल र लाओसबीच अन्तर्राष्ट्रिय फुटबलमा दुई पटक भिडन्त भएको छ । सन् २०१६ मा नेपालले लाओसविरुद्ध अन्तर्राष्ट्रिय मैत्रीपूर्ण खेल र एएफसी सोलिडारिटी कपको सेमिफाइनलमा प्रतिस्पर्धा गरेको थियो । दुवै अवसरमा जापानी प्रशिक्षक ग्योतोकु कोजीले टोलीको प्रशिक्षण सम्हालेका थिए ।

१६ मे २०१६ मा भएको मैत्रीपूर्ण खेल १-१ को बराबरीमा टुंगिएको थियो । विशाल राईले ७६ औं मिनेटमा नेपाललाई अग्रता दिलाएका थिए । तर दुई मिनेटपछि नै फथाना सिभिलेले लाओसलाई बराबरीमा ल्याएका थिए ।

उक्त खेलको ६ महिनापछि नै नेपाल र लाओस सोलिडारिटी कपको सेमिफाइनलमा भिडेका थिए । शारीरिक रुपमा निकै बालियो लाओसले उक्त खेलमा २-२ को बराबरीपछि टाइब्रेकरमा ३-० को जित दर्ता गरेको थियो । उक्त खेलमा सबै ४ गोल हेडरमा भएको थियो ।

लाओसका लागि अग्ला कदका फरवार्ड जाइसोन्खाम चाम्पाथोङले नेपाली डिफेन्सलाई निकै समस्या दिएका थिए । उनैले १८ औं मिनेटमा अग्रता दिलाउँदा विमल घर्ती मगरले ४७ औं मिनेटमा बराबरी गोल फर्काए ।

निर्धारित ९० मिनेट १-१ को बराबरीमा सकिएपछि १ सय ४ औं मिनेटमा अनन्त तामाङले गोल गरेका थिए । तर ४ मिनेट समय बाँकी हुँदा चाम्पाथोङले नै गोल गर्दै खेललाई सुटआउटमा धकेले । हेमन गुरुङ र विक्रम लामाले पेनाल्टी प्रहारमा गोल गर्दा गोलरक्षक किरणले लाओसको सुरुवाती दुवै प्रहार विफल पारेका थिए । सुजल श्रेष्ठले तेस्रो प्रहार गोल गरेपछि लाओसको तेस्रो प्रहार बाहिरिंदा नेपाल विजयी भएको थियो ।

त्यसबेलाको टोलीबाट किरण चेम्जोङ, अनन्त तामाङ, अन्जन विष्ट र नवयुग श्रेष्ठ आजको खेलमा पनि सुरुवात गर्ने सम्भावना छ । त्यसबेला मैदान उत्रेका भरत खवास र आदित्य चौधरी लामो समयपछि पुनरागमन गर्दै यसपटक बेन्चमा रहने देखिन्छ ।