काठमाडौं (हाम्रो खेलकुद) – नेपालका डिफेन्डर अनन्त तामाङ प्रधानमन्त्री थ्री नेसन्स कपको पहिलो खेलमा प्लेयर अफ द म्याच चुनिएका छन् । लाओसविरुद्ध २-० को जितमा सुरुवाती गोल गरेका अनन्तले प्लेयर अफ द म्याच बन्दै २ सय ५० अमेरिकी डलर पनि हात पारे ।

दशरथ रंगशालामा नेपालले ३० औं मिनेटमा अनन्तको गोलमा अग्रता लिएको थियो । अनन्तले एरिक विष्टको कर्नरमा ६ यार्ड बक्स भित्रबाट गोल गरेका थिए । दोस्रो हाफमा नवयुगले सानदार गोल गरेपनि नेपालले २-० को जित दर्ता गरेको हो ।

खेलपछि बोल्दै अनन्तले प्रशिक्षणमा गरेको मिहिनेतको प्रतिफलले गोल भएको बताए । ‘प्रशिक्षणमा सेट पिसमा तयारी गरेका थियौं । प्रशिक्षणमा गरेको प्रयासबाट खेलमा गोल निस्कियो । प्रशिक्षकले दिएको निर्देशन अनुसार त्यसै मुभमेन्टमा गोल गर्न सफल भयौं । खुसी छौं,’ उनले भने ।

टोलीले समग्रमा भने सोचे अनुसार खेल्न नसकेको बताए । ‘हामीले सोचेजस्तो खेल्न सकेनौं । बल पोसेसन हामीले नराखेपनि कम्प्याक्ट डिफेन्स बनाएर खेल्यौं । केहि नयाँ खेलाडी आउनुभएको छ, त्यसैले पनि कम्युनिकेसन राम्रो भएको छैन,’ उनले भने ।

भुटानविरुद्ध खेलमा यो स्तरको खेलमा सुधार गर्नुपर्ने अनन्तले बताए । ‘हामीले भुटानविरुद्ध अझ राम्रो खेल्नुपर्छ । होला भुटान लाओसभन्दा कमजोर होला । तर हामीले आफ्नो प्रदर्शनमा सुधार गर्नुपर्छ । आशा छ आउने दिनमा त्यो हुनेछ,’ उनले थपे ।

अनन्तले नयाँ खेलाडीको आगमन भएकाले पनि केहि समय लाग्ने बताए । ‘धेरै खेलाडी विदेश जाँदा टोलीमा नयाँ पन आएको छ । त्यसले पनि खेलाडीबीच कम्युनिकेसनमा समस्या भएको हो । अब नयाँ आउनुभएका खेलाडीले यसको सदुपयोग गर्नुपर्छ । आशा छ भविष्यमा यो सुध्रदै जानेछ,’ उनले थपे । अनन्तले आफू पनि भविष्यमा विदेशिने हो कि भन्ने प्रश्नमा भने त्यस्तो नहुने बताए ।

भिडियो हेर्नुहोस :