काठमाडौं (हाम्रो खेलकुद) – साफ यू–१७ महिला च्याम्पियनसिपको नेपाली युवा टोलीले पहिलो जित दर्ता गर्ने क्रममा भुटानमाथि फराकिलो जित निकालेको छ ।

बंगलादेशको ढाकास्थित बिएसएसएस मोस्ताफा कमल स्टेडियममा बुधबार भएको खेलमा नेपालले भुटानमाथि ५–० को फराकिलो जित निकाल्दै पहिलो जित दर्ता गरेको हो । नेपाल पहिलो खेलमा भारतसाग ४–१ ले पराजित भएको थियो ।

बुधबार भएको खेलमा नेपालको जितमा वर्षा ओली र सेनु परियारले समान दुई तथा कप्तान दीपा रोकायले एक गोल थपिन् । खेलको १६औं मिनेटमा वर्षा ओलीले सेनु परियारको पासमा गोल गर्दै नेपालका गोलको खाता खोलिन् । वर्षाले वान भर्सेस वानको स्थितिमा सहज गोल गरिन् ।

३०औं मिनेटमा कप्तान दीपा रोकायले गोल गर्दै नेपालको अग्रता दोब्बर पारिन् । सेनु परियारकै पासमा अफसाइड बिट ट्याप गर्दै वर्षाले डिफेन्डरलाई बिट गर्दै गोलरक्षक अघि बढेको अवस्थामा पाएको बललाई दीपाले जाली चुमाइन् । ३४औं मिनेटमा सेनु परियारले गोल गर्दै नेपाललाई पहिलो हाफमा ३–० ले अघि बढाइन् ।

५०औं मिनेटमा वर्षा ओलीले व्यक्तिगत दोस्रो र टोलीका लागि चौथो गोल गरेपछि नेपाल सहज जिततर्फ अघि बढ्यो । ५८अऔं मिनेटमा सेनु परियारले व्यक्तिगत दोस्रो र टोलीका लागि पाँचौ गोल गदै नेपाललाई ५–० को फराकिलो जित दिलाइन् ।

यस जितसँगै नेपालले दुई खेलबाट ३ अंब बटुलेको छ । भुटानले अंकको खाता खोल्न सकेको छैन । बुधबार नै रसियाले घरेलु टोली बंगलादेशलाई ३–० ले पराजित गर्दै विजयी सुरुवात गरेको छ ।

यू–१७ च्याम्पियनसिपमा नेपाल, बंगलादेश, भुटान, भारत र रुसको सहभागिता रहेको छ । नेपालले क२६ मार्चमा रसिया र २८ मार्चमा आयोजक बंगलादेशसँग खेल्नेछ । सिंगल राउण्ड रोबिनपछि शीर्षस्थानमा रहने टोली च्याम्पियन बन्नेछ ।