काठमाडौं (हाम्रो खेलकुद) – नेपाली राष्ट्रिय फुटबल टोलीका फरवार्ड नवयुग श्रेष्ठले नेपालमा पहिलो पटक अन्तर्राष्ट्रिय गोल गरेका छन् ।
प्रधानमन्त्री थ्री नेसन्स कप अन्तर्गत बुधबार दशरथ रंगशालामा लाओसविरुद्ध नवयुगले दोस्रो हाफमा दर्शनीय गोल गरेका थिए । उनले लाओसको हाफको मध्यभागमा बललाई नियन्त्रणमा लिने प्रयासमा भलीमार्फत सुन्दर गोल गरेका थिए । यो उनको आठौं अन्तर्राष्ट्रिय गोल हो ।
सन् २०१५ यता राष्ट्रिय टोलीका लागि खेल्दै आएका नवयुगको घरेलु मैदानमा भने यो पहिलो गोल हो । नवयुगले यसअघि राष्ट्रिय टोलीका लागि गरेका सबै ७ गोल नेपालबाहिर रहेको थियो । सन् २०१६ मा बंगालदेशमा सम्पन्न बंगबन्धु कपमा माल्दिभ्सविरुद्ध ह्याट्रिक गर्दै नवयुगले गोलको खाता खोलेका थिए ।
त्यसै वर्ष नोभेम्बरमा उनले एएफसी सोलिडारिटी कपमा ब्रुनाईविरुद्ध पनि गोल गरे । सन् २०१८ मार्चमा यमनविरुद्ध एसियन कप छनोटमा गोल गरेका उनले त्यसै वर्ष साफ च्याम्पियनसिपमा बंगलादेशविरुद्ध पनि गोल गरेका थिए । नवयुगले पछिल्लो पटक सन् २०२१ मा विश्वकप छनोटको दौरान चाइनिज ताइपेइविरुद्ध गोल गरेका थिए ।
