एजेन्सी – दुई गोलको अग्रता जोगाउन नसक्दा दक्षिण कोरिया अन्तर्राष्ट्रिय मैत्रीपूर्ण खेलमा कोलम्वियासँग बराबरीमा रोकिएको छ । दक्षिण कोरिया र कोलम्वियाले २–२ गोलको बराबरी खेलेको हो ।

उल्सान मुन्सु फुटबल स्टेडियम उल्सनमा शुक्रबार भएको खेलका घरेलु टोली कोरियाका लागि दुवै गोल ह्युङ मिन सनले गोल गर्दा कोलम्वियाका हामेस रोड्रिग्वेज र जर्ज कारस्कलले गोल फर्काए ।

खेलको १०औं मिनेटमा ह्युङ मिन सनको गोलबाट घरेलु टोलीले १–० को अग्रता लिन सफल भएको थियो । पहिलो हाफको इन्ज्युरी समयको थप गरिएको दोस्रो मिनेटमा सनले व्यक्तिगत र टोलीका लागि दोस्रो गोल गर्दै टोलीको अग्रता दोब्बर पारे । तर कोरियाले त्यो अग्रतालाई दोस्रो हाफमा जोगाउन सकेन ।

दुई गोलले पछि परेको कोलम्वियाले दोस्रो हाफमा दुई मिनेटको अन्तरमा दुई गोल गर्दै खेललाई २–२ गोलको बराबरीमा ल्याए ।४७औं मिनेटमा हामेस रोड्रिग्वेजले गोल गर्दै कोलम्वियालाई खेलमा फर्कने संकेत दिए ।

त्यसको दुई मिनेटपछि जर्ज कारस्कलले गोल गर्दै खेललाई २–२ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा सकियो ।

यस नतिजासँगै दक्षिण कोरियाले कोलम्वियासँग आफ्नो अपराजित यात्रा कायम राख्न सफल भएको छ । सन् २०१७ र २०१९ को मैत्रीपूर्ण खेलमा कोरियाले समान २–१ कै जित निकाल्न सफल भएको थियो । यसपटक पनि कोरियाले दुई गोलको अग्रता लिएर पनि जोगाउन नसक्दा जितबाट वञ्चित बन्यो ।

अर्काे मैत्रीपूर्ण खेलमा अष्ट्रेलियाले इक्वेडरलाई ३–१ ले पराजित गरेको छ । अष्ट्रेलियाको जितमा ज्याक्सन इर्भिन, एवेर माविल र गराङ कुओलले गोल गरे । इक्वेडरका फेलिक्स टोरेसले एक गोल फर्काए ।