काठमाडौं (हाम्रो खेलकुद) – प्रधानमन्त्री थ्री नेसन्स कपमा लाओसले भुटानलाई पराजित गरेको छ । दशरथ रंगशालामा सम्पन्न खेलमा बोन्पाचान बोन्कोंगको दुई गोलमा लाओसले २-१ को जित दर्ता गरेको हो ।

निकै प्रतिस्पर्धात्मक खेलमा लाओसले खेलमा सुरुवात अग्रता लिएपनि भुटान स्टार फरवार्ड चेन्चो ग्याल्सेनको गोलसँगै खेलमा फर्किएको थियो । खेलको तेस्रो मिनेटमा नै लाओसले अग्रता लिएको थियो । बोन्पाचान बोन्कोंगले गोल गर्दै लाओसलाई अघि बढाए । पेनाल्टी क्षेत्र भित्रबाट उनले गरेको प्रहार गोलरक्षक छिरिङ धोन्दुपले बचाउन सकेनन् ।

खेलको ३४ औं मिनेटमा भुटानले बराबरी गोल गर्यो । फरवार्ड चेन्चो ग्यालेसनले भुटानका लागि उत्कृष्ट गोल गरे । निमा वाङदीले मिडफिल्डबाट खेलेको लामो पासलाई चेन्चोले छातीले नियन्त्रणमा लिँदै दोस्रो टचमा फिनिस गरे । लाओसले डिफेन्सबाट खेलेको बल निमाले रोक्दै खेलेको लामो पासमा गोल सम्भव भएको थियो ।

दोस्रो हाफको ७१ औं मिनेटमा बोन्कोंगले लाओसलाई पुन: अग्रता दिलाए । कप्तान सुकाफोन भोङचेखामले दिएको लामो पासलाई उनले पेनाल्टी क्षेत्रको कुनाबाट सिधै गोल गरे । उनको हाफ भली गोलरक्षक छिरिङले बचाउने कुनै अवसर पाएनन् ।

९० औं मिनेटमा तेन्जिङ दोर्जीको प्रहार पोस्टमा लाग्दा भुटान बराबरी गर्नबाट चुक्यो । यस जितले ३ अंक बोकेको लाओसको फाइनल पुग्ने सम्भावना जीवित छ । अब मंगलबार हुने समूह चरणको अन्तिम खेलमा ३ अंक जोडेको नेपाल र भुटान भिड्नेछन् । पहिलो खेलमा नेपालले लाओसलाई २-० ले हराएको थियो । फाइनल खेल शुक्रबार हुनेछ ।