काठमाडौं (हाम्रो खेलकुद)– जापानमा आयोजना हुने कोपा टोरेरोस प्रिमाभेरा यू १२ अन्तर्राष्ट्रिय फुटबल प्रतियोगितामा नेपालको बिजी फुटबल एकेडेमीले लिने भएको छ । ११ खेलाडीसहित १३ सदस्यीय टोली मंगलबार त्यसतर्फ प्रस्थान गरेको छ ।

बिजी फुटबल एकेडेमी राष्ट्रिय फुटबल टोलीका पूर्व सदस्य बसन्त गौचनले स्थापना गरेको एकेडेमी हो । राजेन्द्र तामाङको प्रशिक्षणमा रहेको बिजी फुटबल एकेडेमी प्रतियोगिताको समूह डीमा रहेको छ । बिजी रहेको समूहमा उरावा रेड्स, माल्भा एफसी र फुजीमिगाओका एफसी रहेका छन् ।

चैत २१ देखि २४ गते सम्म सन्चालन हुने प्रतियोगितामा ४० टोलीको सहभागिता रहेको जापानमा रहेका पूर्व राष्ट्रिय खेलाडी गौचनले जानकारी दिए । जापान जाने टोलीलाई राष्ट्रपति रामचन्द्र पौडेलले विदाई गरेका थिए ।

छुट्टै कार्यक्रममा अखिल नेपाल फुटबल संघ (एन्फा) का अध्यक्ष पंकजविक्रम नेम्वाङले पनि टोलीको विदाई गरेको थियो । जापानमा रहेर फुटबल प्रशिक्षण गर्दै आएका गौचनको पहलमा नेपाली क्लबहरुले उमेर समूहको प्रतियोगिता खेल्दै आएका छन् ।