काठमाडौं (हाम्रो खेलकुद) – नेपाली राष्ट्रिय फुटबल टोलीले प्रधानमन्त्री थ्री नेसन्स कप अन्तर्गत समूह चरणको अन्तिम खेलमा मंगलबार भुटानसँग १-१ को बराबरी खेल्यो ।
खेलको दोस्रो हाफमा नेपालले फरवार्ड अन्जन विष्टलाई चोटका कारण गुमायो । भुटानका गोलरक्षक छिरिङ धेन्दुपसँग जुध्न पुग्दा अन्जन घाइते भएका थिए । गोलरक्षकविरुद्ध ५०/५० बलमा जुध्दा अन्जनले गरेको हेडर गोलरक्षकले बचाएपनि अन्जनको ढाडमा चोट लागेको थियो ।
राष्ट्रिय टोलीका फिजियो आविष्कार पुडासैनीले अन्जनलाई तुरुन्त मैदानभित्र प्रारम्भिक जाँच गरेका थिए । अन्जनको ढाडमा समस्या देखिएपछि उनलाई स्ट्रेचरमा राखेर मैदानबाहिर लगिएको थियो । अन्जनको ठाउँमा दिपक राज सिंह ठकुरी मैदान प्रवेश गरेका थिए ।
अन्जनलाई त्यसपछि थप परिक्षणका लागि रंगशाला बाहिर रहेको ब्लु क्रस हस्पिटलको इमर्जेन्सीमा लागिएको थियो । त्यहाँ प्रारम्भिक परिक्षण र एक्सरे गर्दा उनको ढाडमा गम्भीर समस्या नदेखिएको र ठोक्किन पुग्दा सामान्य दुखाइ देखिएको हो ।
डाक्टरले उनलाई मंगलबार राती खेलपछि नै टिम होटेलमा जान अनुमति दिएका छन् । अन्जनलाई विश्राम लिन सुझाव दिइएको छ । उनलाई दुई दिनमा थप जाँचका लागि बोलाइएको छ । यससँगै अन्जनले शुक्रबार हुने फाइनल गुमाउने प्रबल सम्भावना रहेको छ ।
यसअघि पनि अनुहारको चोटका कारण अन्जनले पहिलो खेल गुमाएका थिए । उनले शनिबारबाट मात्र सुरक्षा मास्क लगाएर प्रशिक्षण गरेका थिए । भुटानविरुद्ध खेलअघि पनि अन्जनले वार्मअप गर्ने क्रममा मास्क लगाएका थिए । तर खेल्न असहज हुने भएपछि उनले मास्कविना मैदान उत्रिएका थिए ।
