काठमाडौं (हाम्रो खेलकुद) – क्यामरुनको एभेनिर एफसीले छैटौं संस्करणको अन्तर्राष्ट्रिय आमन्त्रण मेयर भोजपुर गोल्डकप फुटबल प्रतियोगिताको उपाधि जितेको छ ।
आयोजक भोजपुर जिल्ला फुटबल संघलाई २–० ले पराजित गर्दै एभेनिरले उपाधि जित्न सफल भएको हो । एभेनिरलाई च्याम्पियन बनाउन एनगुइनी र टिम्वा टिम्वाले गोल गरे ।
भोजपुर रंगशालामा बिहीबार भएको खेलको ४२औं मिनेटमा एनगुइनीको गोलबाट अग्रता लिएको थियो । त्यसपछि इन्ज्युरी समयको थप गरिएको तेस्रो मिनेटमा टिम्वाले गोल गर्दै एभेनिरको जित पक्का गरे । फाइनलमा भोजपुर जिल्ला फुटबल संघका धिरज मगर म्यान अफ दि म्याच घोषित भए ।
उपाधिसँगै एभेनिरले नगद ५ लाखसहित ट्रफी, मेडल तथा प्रमाणपत्र प्राप्त गरे । उपविजेता भोजपुरले ३ लाखसहित ट्रफी, मेडल तथा प्रमाणपत्र हात पारे ।
भोजपुर जिल्ला फुटबल संघका विजय भुजेल प्रतियोगिताको सर्वाेत्कृष्ट खेलाडी घोषित भए । एभेनिरका एलेन उत्कृष्ट गोलरक्षक, एन सानगोउ डिफेन्डर र एनगुइनी उत्कृष्ट मिडफिल्डर चुनिए ।
सागर लामा उत्कृष्ट प्रशिक्षक चुनिदा भोजपुरका सन्तोष तामाङ र एभेनिरका टिम्वा संयुक्त रुपमा सर्वाधिक गोलकर्ता बने । विजयी टोली तथा खेलाडीलाई भोजपुर नगरपालिकाका मेयर केलाश कुमार आले लगायतले पुरस्कृत गरे ।
चैत्र १० देखि १६ गतेसम्म भएको प्रतियोगितामा आयोजक भोजपुर जिल्ला फुटबल संघ, भारतका युकेएफसी, एभिनियर एफसी, एनबीवाईसी सप्तरी, गोर्खा ब्वाइज रुपन्देही, डाँगीहाट युथ क्लब मोरङ, भगवती स्पोर्टस् क्लब खोटाङ र बसाहा क्लब उदयपुरको सहभागिता रहेको थियो ।
