एजेन्सी – नर्वेली फरवार्ड एर्लिङ ब्राउट हालान्डले इंग्लिस प्रिमियर लिग अन्तरगत लिभरपुलविरुद्धको महत्वपूर्ण खेल गुमाउने सम्भावना बढेको छ ।
उपाधि दौडमा रहेको म्यानचेस्टर सिटी र लिभरपुलबीचको खेल शनिबार साँझ ५ः१५ बजे सिटीको मैदान इतिहाद स्टेडियममा हुँदैछ । २२ वर्षीय हालान्डले दुई साताअघि ग्रोइन इन्ज्युरी बोकेका थिए । उनको प्रख्यात शल्यचिकित्सक डाक्टर रामोन कुगाटसँगै अहिले सिटीकै डाक्टरले उपचार गराइरहेका छन् ।
१९ मार्चमा बर्नलेविरुद्धको एफए कपको क्वाटरफाइनलमा ह्याट्रिक पूरा गरेको खेलपछि नै हालान्डले चोटको महसुस गरेका थिए । उनको या सिजनको छैटौं ह्याट्रिक हो । चोटकै कारण हालान्डले युरो २०२४ को छनोट अन्तरगत स्पेन र जर्जियाविरुद्धको खेल पनि गुमाउन पुगेको थियो । अन्तर्राष्ट्रिय विश्रामपछि फर्किएपछि हालान्डले आफ्ना सहकर्मीहरूसँग पछिल्लो दुई दिनदेखि प्रशिक्षण गरेका छैनन् ।
यो सिजन सबै खाले खेलमा गरी ४२ गोल गरिसकेका हालान्डको अभाव लिभरपुलविरुद्धको खेलमा हुन सक्नेछ । एपेन्डिक्सकै शल्यक्रिया गरेका फिल फोडेनले पनि लिभरपुलविरुद्ध खेल्ने सम्भावना न्युन छ ।
सिटीका प्रशिक्षक पेप गुआर्डीओलाले हालान्डविरुद्ध जोखिम मोल्ने छैन । एक खेल कम खेलेको सिटीलाई अंक अन्तर कम गर्न लिभरपुलविरुद्ध जित आवश्यक छ ।
हालान्डका बुबा अल्फीले पनि हालान्डले खेल्ने सम्भावना न्युन रहेको बताएका छन् । हालान्ड र फोडेनको अनुपस्थिति सिटीको लागि धक्का हो भने लिभपुललाई सिटीमाथि जित निकाल्ने अवसर हो ।
लिभरपुलले यस सिजन सिटीलाई दुई पटक पराजित गरेको छ । ३० जुलाई २०२२ मा कम्युनिटी शिल्ड र अक्टोवरमा भएको प्रिमियर लिगमा लिभरपुलले सिटीलाई हराएको थियो । त्यसपछि गत डिसेम्वरमा भएको इएफएल कपमा सिटीले ३–२ को जित निकालेको थियो ।
