एजेन्सी – बर्नले रेलिगेसनमा परेको एक सिजनपछि नै इंग्लिस प्रिमियर लिगमा बढुवा हुन सफल भएको छ । च्याम्पियनसिपमा मिडल्सब्रगलाई २–१ ले पराजित गर्दै बर्नले ७ खेल बाँकी छँदै प्रिमियर लिगमा बढुवा हुन सफल भएको हो ।

बर्नले गत सिजन १८औं स्थानमा रहँदै रेलिगेसनमा परेको थियो । रिभरसाइड स्टेडियम मिडल्सब्रगमा शुक्रबार राति भएको खेलमा बर्नलेको जितमा एस्ले बार्नेस र कोनर रोबर्ट्सले गोल गरे । घरेलु टोली मिडल्सब्रगका चुवा अकपोमले एक गोल फर्काए ।

खेलको १२औं मिनेटमा एस्ले बार्नेसको गोलबाट बर्नलेले १–० को अग्रता लिन सफल भएको थियो । उनले जोश ब्राउनहिलको पासलाई सदुपयोग गरेका थिए । ४८औं मिनेटमा चुवाले पेनाल्टीमा गोल गर्दै खेललाई १–१ गोलको बराबरीमा ल्याए ।

६६औं मिनेटमा कोनर रोबर्ट्सले नाथन टेलाको पासमा गोल गर्दै बर्नलेको जित पक्का गर्दै टोलीलाई प्रिमियर लिगमा बढुवा गराए । यस जितले शीर्षस्थानमा रहेको बर्नलेको ३९ खेलबाट ७ अंक पुगेको छ । अब बर्नले आफ्नो सबै ७ खेलमा पराजित भएपनि तेस्रो स्थानमा रहेको लुटनले भेट्ने छैन ।

लुटनको ४० खेलबाट ६८ अंक छ । बर्नलेसँगको हारसँगै मिडल्सब्रगको शीर्ष डिभिजनमा बढुवा हुने सम्भावना न्युन बनेको छ । दोस्रो हार बेहोरेको मिडल्सब्रग ४० खेलबाट ६७ अंक जोडेर चौथो स्थानमा रहेको छ । अब एक टोली शीर्ष डिभिजनमा बढुवा हुनेछ ।

प्रिमिर लिग क्लब म्यानचेस्टर सिटीका बेल्जियन पुर्व डिफेन्डर भिन्सेन्ट कोम्पनीले आफ्नो प्रशिक्षणमा बर्नलेलाई प्रिमियर लिगमा पुनः बढुवा गराउन सफल भए । बेल्जियन क्लब एन्डरलेक्टबाट प्रशिक्षण करिअर सुरु गरेका ३६ वर्षीय कोम्पनी सन् २०२२ मा बर्नलेको मुख्य प्रशिक्षक बनेका थिए ।

गत नोभेम्बरदेखि च्याम्पियनसिपमा अपराजित रहेको बर्नले अक्टोवरदेखि शीर्षस्थानमा उक्लदै त्यसलाई निरन्तरता दिन सफल भएको थियो । अब बर्नलेलाई उपाधि सुरक्षित गर्न अन्तिम सात खेलबाट केवल ११ अंकको खाँचो छ ।

अब ७ खेलबाट १३ अंक जोड्न सके बर्नले सन् २०१३–१४ को सिजनमा लेस्टर सिटीले पु¥याएको १०० अंकको कीर्तिमानलाई भेट्नेछ । बर्नले दोस्रो स्थानको सेफिल्ड युनाइटेडभन्दा ११ अंकले अघि छ ।