लन्डन (एन्जेसी)– प्रिमियर लिगको शीर्ष टोली चेल्सीका प्रशिक्षक एन्टेनियो कोन्टेलाई कीर्तिमान भन्दा पनि जितसँग बढी मतलब छ । चेल्सीले आज राती टोटेनह्यामसँग खेल्दा तीन अंकमै बढी केन्द्रित हुने कोन्टेले दाबी गरेका छन् ।

प्रिमियर लिगमा लगातार १३ खेल जित्दै चेल्सी अंकतालिको शीर्षस्थानमा मजबुद अवस्थामा रहेको छ । एकै सिजनमा लगातार १३ खेल जित्ने आर्सनलको कीर्तिमानसँग बराबरी गरेको चेल्सीले आजको खेल जितेमा लगातार १४ जितको नयाँ कीर्तिमान बनाउने छ ।

तपाई र खेलाडीले नयाँ कीर्तिमानका लागि केही सोच्नु भएको छ भन्ने प्रश्नको जवाफमा कोन्टेले भने, ‘म, खेलाडी हामी सबैको एउटा चाहना भनेको तीन अंक प्राप्त गर्नु हो । लगातार १३ खेलमा सफल भएर ३९ अंक जोड्ने कीर्तिमान राख्नु आफैमा ठूलो उपलब्धि हो । अरु विषयमा हाम्रो लागि धेरै महत्वपूर्ण छैन । यस्तो खेलले हाम्रो मनोबल बढाउँछ । टोटेनह्याम मात्र होइन सबै टोली हामीलाई रोक्न चाहन्छन् ।’

चेल्सी र टोटेनह्यामबीचको खेल नेपाली समयअनुसार बिहीबार बिहान १ः४५ मा सुरु हुनेछ ।