काठमाडौं (हाम्रो खेलकुद) – सुरुवाती अग्रता जोगाउन नसक्दा सहिद स्मारक ‘ए’ डिभिजन लिगको शीर्षस्थानमा रहेको जावलाखेल युथ क्लब संकटा क्लबसँग बराबरीमा रोकिएको छ ।

जावलाखेल संकटासँग १–१ गोलको बराबरीमा रोकिएको हो । जावलाखेलका फोडे फोफानाले गोल गर्दा संकटाले निशान खड्काले बराबरी गोल फर्काए ।

च्यासल रंगशालामा शनिबार नै हुनुपर्ने खेल भारी वर्षाका कारण हुन नसकेपछि अखिल नेपाल फुटबल संघ (एन्फा) ले बाँकी समयको खेल आइतबार एन्फा कम्प्लेक्सको खेल मैदानमा गराएको थियो । तर, जावलाखेलले त्यो अग्रतालाई दोस्रो हाफमा जोगाउन सकेन ।

खेलको ३३औं मिनेटमा फोडे फोफानाले गोल गर्दै जावलाखेललाई १–० को अग्रता दिलाएका थिए । ७३औं मिनेट निशान खड्काले गोल गर्दै खेललाई १–१ गोलको बराबरीमा ल्याए ।

मनिष डाँगीको ब्याक पासलाई निशानले गरेको क्रस दोस्रो बारको टप कर्नरमा गोलमा परिणत हुँदा जावलाखेलका गोलरक्षक अनिल देउलाले बचाउने कुनै अवसर नै पाएन । त्यसपछि थप गोल निस्कन नसक्दा खेल बराबरीमा सकियो ।

यस बराबरीसँगै शीर्षस्थानमा रहेको जावलाखेलको १३ खेलबाट २४ अंक पुगेको छ । जावलाखेल दोस्रो स्थानको थ्री स्टारभन्दा २ अंकले अघि छ । थ्री स्टारको २२ अंक छ । जावलाखेललाई रोकेको संकटा १६ अंक जोडेर आठौं स्थानमा छ ।