एजेन्सी – इंग्लिस प्रिमियर लिग क्लब लिड्स युनाइटेडका पूर्व प्रशिक्षक मार्सेलो बिएल्सा उरुग्वेको मुख्य प्रशिक्षकमा नियुक्त भएका छन् ।

उरुग्वेले सोमबार ६७ वर्षीय बिएल्सालाई मुख्य प्रशिक्षकमा नियुक्त गरेको जनाएको छ । गत नोभेम्वर र डिसेम्वरमा कतारमा भएको फिफा विश्वकप २०२२ मा समूह चरणबाटै बाहिरिएपछि तत्कालिन मुख्य प्रशिक्षक डिएगो अलोन्सोले राजीनामा दिएपछि मार्सेलो ब्रोली फेब्रुअरीदेखि उरुग्वेको अन्तरिम मुख्य प्रशिक्षक बनेका थिए ।

बिएल्सा पनि २०२२ को फेब्रुअरीमा लिड्सबाट बर्खास्तीमा परेपछि जागिरविहीन बनेका थिए । उनलाई अनुबन्ध गर्न बर्नमाउथ र एभर्टनले पनि प्रयास गरेका थिए ।

बिएल्सा सन् २०१८ मा लिड्सको मुख्य प्रशिक्षक बनेका थिए । लिड्सलाई १६ वर्षपछि प्रिमियर लिगमा बढुवा गराएपनि उनी क्लबका समर्थकमाझ लोकप्रिय छन् ।

प्रिमियर लिगमा जानुअघि उनले फ्रान्स, इटाली, स्पेन र अर्जेन्टिनाका पनि प्रशिक्षक बनिसकेका छन् । साथै उनी २००७ देखि २०११ मा चिलीका मुख्य प्रशिक्षक बनेका थिए ।

उनले अर्जेन्टिनाको न्युवेल वल्ड ब्वाइज, अमेरिकी क्लब, स्पेनिस क्लबसँगै फ्रान्सेली क्लबमा पनि प्रशिक्षण सम्हालिसकेका छन् । उरुग्वे फिफाको विश्व वरियतामा १६औं स्थानमा छ ।