एजेन्सी – उपाधि होडमा रहेको लन्डन क्लब आर्सनलले हार बेहोरेसँगै म्यानचेस्टर सिटी लगातार तेस्रो सिजन इंग्लिस प्रिमियर लिग च्याम्पियन बनेको छ ।

सिटी प्रिमियर लिगको तीन खेल बाँकी छँदै लगातार तेस्रो सिजन प्रिमियर लिगको च्याम्पियन बन्न सफल भएको हो । अब दोस्रो स्थानमा रहेको आर्सननले एक खेल मात्रै खेल्न बाँकी छ । यो खेलमा जित हात पारेपनि ४ अंकले अघि रहेको सिटीले बाँकी तीनै खेल गुमाएपनि च्याम्पियन बन्न कुनै असर गर्ने छैन ।

पेप ग्वार्डिओलाको टोलीले पछिल्ला ६ मध्ये पाँचमा उपाधि जितेको छ । सिटीलाई ट्रेबल उपाधि जित्ने मौका पनि छ । सिटी एफए कप र च्याम्पियन्स लिगको फाइनलमा पुगिसकेको छ ।

सन् १९९८–९९ मा मात्र म्यानचेस्टर युनाइटेडले यो उपलब्धि हासिल गरेको थियो । सिटीले जुन ३ मा वेम्वलीमा डर्वी प्रतिद्धन्द्धी म्यानचेस्टर युनाइटेडसँग एफए कपको उपाधिका लागि खेल्दैछ । त्यसको एक सातापछि सिटीले इस्तानबुलमा इन्टर मिलानको सामना गर्नेछ ।

सिटीले आइतबार चेल्सीसँगको खेलपछि प्रिमियर लिगको ट्रफी उचाल्नेछ । कप्तान इल्के गुन्डोगनले लगतार तीन पटक र छ वर्षमा पाँच पटक यो ट्रफी जित्नु अविश्वसनीय रहेको बताएका छन् ।

क्लबको इतिहासमा नवौं पटक च्याम्पियन बनेको सिटी ७ अप्रिलसम्म ८ अंकले पछि परेको थियो । तर, त्यसपछि आर्सनलले ८ खेलबाट केवल ९ अंक बटुल्दा यही समयमा सिटीले ७ खेलबाट सबै २१ अंक बटुल्दै उपाधि जित्ने सम्भावना अघि बढाएको थियो ।

प्रिमियर लिगको १० खेल बाँकी रहँदा ६९ अंकसहित शीर्षस्थानमा रहेको आर्सनल भने लगातारको खराव प्रदर्शनसँगै सिटीलाई उपाधि सुम्पन पुग्यो । सन् २०१८–१९ को सिजनमा लिभरपुलले पनि यस्तै नियति भोगेको थियो । अन्तिम समयसम्म पनि उपाधिका लागि लडिरहेको लिभरपुल १ अंकले पछि रहँदै उपविजेतामा सीमित बनेको थियो ।

हडर्सफिल्ड टाउन (१९२४–२६), आर्सनल (१९३३–३५), लिभरपुल (१९८२–८४) र सर एलेक्स फर्गुसनको नेतृत्वमा दुईपटक १९९९–२००१ र २००७–२००९ पछि सिटी लगातार तेस्रोपटक उपाधि जित्ने पाँचौ टोली बनेको छ ।

पेप गुआर्डिओलाले सन् २००९–११ मा बार्सिलोनासँग ला लिगा र सन् २०१४–१६ मा बायर्न म्युनिखसँग बुन्डेसलिगामा लगातार तीनवटा लिग उपाधि जित्न सफल भएको थियो । उनको यो तेस्रो ह्याट्रिक उपाधि हो ।

पछिल्लो सिजन सिटीले प्रिमियर लिगमा प्रभुत्व जमाएको छ । सिटीले ६ मध्ये ५ उपाधि जितेको छ । म्यानचेस्टर युनाइटेडले १९९६ र २००१ को बीचमा यो उपलब्धि हासिल गरेको थियो । यो अवधिमा युनाइटेडले प्रिमियर लिग, एफए कप र च्याम्पियन्स लिगको ट्रेबल उपाधि जितेका थिए ।

युनाइटेडले सन् १९९३–२००१ को बीच ९ सिजनमा सात उपाधि पनि तथा सन् २००७–२०१३ को सात सिजनमा पाँचवटा उपाधि जितेको थियो । त्यसअघि, लिभरपुलले १९७० को दशकको उत्तरार्ध र ८० को दशकको प्रारम्भमा लिग सफलताको आनन्द उठाएको थियो ।

दि सिटी ग्राउन्ड नटिङहममा घरेलु टोलीको जितमा पहिलो हाफमा ताइओ एवोनियीले गरेको गोल नै निर्णायक बन्यो । उनले १९औं मिनेटमा गोल गर्न सफल भएका थिए । यस जितसँगै नटिङहम ३७ खेलबाट ३७ अंक नै जोडेर १६औं स्थानमा छ । आर्सनल ३७ खेलबाट ८१ अंक जोडेर दोस्रो स्थानमा छ ।

अन्य नतिजा
टोटेनहमविरुद्ध ब्रेन्टफर्ड (१–३)
बर्नमाउथविरुद्ध म्यानचेस्टर युनाइटेड (०–१)
फुलहमविरुद्ध क्रिस्टल प्यालेस (२–२)
लिभरपुलविरुद्ध एस्टन भिल्ला (१–१)
वल्भ्सविरुद्ध एभर्टन (१–१)