एजेन्सी – इंग्लिस युवा फरवार्ड बुकायो साकाले लन्डन क्लब आर्सनलमा सम्झौता नविकरण गरेका छन् । साकाले २०२७ सम्म आर्सनलमा रहन नयाँ सम्झौतामा हस्ताक्षर गरेका छन् ।

इंग्लिस फरवार्डले यो सिजन गनर्सका लागि १४ गोलसँगै ११ सहयोग गरेका छन् । २१ वर्षीय साकाले आर्सनलका लागि १७८ खेल खेलिसकेका छन् ।

‘म साँच्चै खुसी छु ।’ साकाले भने, ‘त्यहाँ धेरै कुराहरू भएको छ र धेरै समय भयो, तर म अहिले यहाँ छु । मलाई लाग्छ कि यो सही र सुन्दर क्लब हो । हामी कहाँ छौं हेर्नुहोस् ।’

साकाको अघिल्लो सम्झौता २०२३–२४ सिजनको अन्त्यमा सकिँदै थियो । दोस्रो स्थानमा रहेको आर्सनलले आइतबार सिजनको आफ्नो अन्तिम खेलमा वल्भ्ससँग खेल्दैछ । अर्को सिजन, गनर्सले ६ वर्षपछि च्याम्पियन्स लिग खेल्नेछ ।

‘मैले धेरै परिवर्तन देखेको छु । मैले यो टोली र क्लब माथिल्लो स्तरमा पुगेको देखेको छु, हामी उत्साहित छौं । हामी सही दिशामा गइरहेका छौं ।’ साकाले थपे ।

आर्सनलका मुख्य प्रशिक्षक मिकेल अर्टेटाले बुकायोले आफ्नो सम्झौता लम्ब्याउनु क्लबको लागि ठूलो कुरा रहेको र उत्कृष्ट युवा प्रतिभालाई क्लबलाई राख्न सक्नु महत्वपूर्ण रहेको बताएका छन् ।

आर्सनलकै एकेडेमीबाट उत्पादित साकाले २०१८–१९ को सिजनपछि आर्सनलको सिनियर टोलीबाट खेलिरहेका छन् । उनले १७८ खेलमा ३७ गोल गरिसकेका छन् ।

इंग्ल्यान्डको उमेर समूह यु–१६, यु१७, यु–१८, यु–१९ र यु–२१ बाट खेलिसकेका साका २०२० देखि सिनियर टोलीमा छन् । उनले २६ खेलमा ८ अन्तर्राष्ट्रिय गोल गरिसकेका छन् ।