एजेन्सी – सुरुवाती अग्रता जोगाउन नसक्दा यो सिजनको इंग्लिस प्रिमियर लिग च्याम्पियन बनिसकेको म्यानचेस्टर सिटी बराबरीमा रोकिएको छ ।
सिटी घरेलु टोली ब्राइटन होभ अल्वियोनसँग १–१ गोलको बराबरीमा रोकिएको हो । सिटीका लागि फिल फोडेनले गोल गर्दा ब्राइटनका जुलियो इनसिसोले बराबरी गोल फर्काए ।
दि अमेरिकन एक्प्रेस कम्युनिटी स्टेडियम फाल्मेरमा बुधबार राति भएको खेलको २५औं मिनेटमा फिल फोडेनको गोलबाट सिटीले १–० को अग्रता लिन सफल भयो । उनले एर्लिङ ब्राउट हालान्डको पासमा गोल गर्न सफल भएका थिए ।
तर, त्यो अग्रतालाई सिटीले जोगाउन सकेन । ३८औं मिनेटमा जुलियोले गोल गर्दै खेललाई १–१ गोलको बराबरीमा ल्याए । उनले लेभी कोलविलको पासमा गोल गर्न सफल भएका थिए ।
त्यसपछि थप गोल निस्कन नसक्दा खेल बराबरीमा रोकिन पुग्यो । यस बराबरीसँगै च्याम्पियन सिटीको ३७ खेलबाट ८९ अंक पुगेको छ । ब्राइटन ६२ अंक जोडेर छैटौं स्थानमा छ ।
यस बराबरीसँगै ब्राइटन शीर्ष ६ मा रहँदै अर्काे सिजनको युरोपा लिग खेल्ने पक्का भएको छ ।
