काठमाडौं (हाम्रो खेलकुद) – क्यामरुनी फरवार्डद्धय मेसुके ओलोमोउ र स्टेफन समिर विनोङको गोलमा रेलिगेसन जोनको पुछारमा रहेको एफसी खुमलटारले सहिद स्मारक ‘ए’ डिभिजन लिगमा पूनरागमन जित निकालेको छ ।

खुलमलटारले एक गोलले पछि परेको स्थिति उल्ट्याएर हिमालयन शेर्पा क्लबमाथि २–१ को पूनरागमन जित निकालेको हो ।

त्रिपुरेश्वरस्थित दथरथ रंगशालामा सोमबार भएको खेलमा खुमलटारको पूनरागमन जितमा मेसुके ओलोमोउ र स्टेफन समिर विनोङले गोल गरे । शेर्पाका म्यानुयल नानाको गोल सान्त्वना बन्यो ।

खेलको छैटौं मिनेटमा नै म्यानुयल नानाको गोलबाट शेर्पाले १–० को अग्रता लिन सफल भयो । खामिर गिल्सन कनदङ्वाको कर्नरमा नानाको फ्रि हेडरमा खुमलटारको डिफेन्स र गोलरक्षकले कुनै प्रतिक्रिया नै जनाउन पाएन ।

तर, शेर्पाको त्यो अग्रता लामो समय टिकेन । १७औं मिनेटमा मेसुके ओलोमोउले गोल गर्दै खेललाई १–१ गोलको बराबरीमा ल्याए ।

जय गुरुङको फ्रिकिकमा अभिषेक लिम्बुको हेडर पासमा अनमार्क रहेका मेसुकेले वान टचमा फिनिस गरे । उनको प्रहारलाई गोलरक्षक किशोर गिरीले बचाउने प्रयास गरेपनि सफल हुन सकेन ।

७६औं मिनेटमा स्टेफन समिर विनोङले गोल गर्दै खुमलटारलाई २–१ को अग्रता दिलाए । मेसुकेको क्रसलाई शेर्पाका डिफेन्डर सुरेश कुमालको कमजोर क्लियरेन्स विनोङ समक्ष नै पुगेपछि उनले नियन्त्रणमा लिदै गरेको ओभर हेड किकलाई गोलरक्षक किशोरले रोक्ने कुनै मौका नै पाएन ।

यस जितले खुमलाटार रेलिगेसन जोनकै पुछारमा रहेपनि अर्काे रेलिगेसन जोनमा रहेको फ्रेन्ड््स क्लबसँग अंक बराबरी गरेको छ । खुमलटार २२ खेलबाट २४ अंकसहित पुछारमा छ ।

एक खेल कम खेलेको फ्रेन्ड्सको पनि २४ अंक नै छ । पराजित शेर्पाले चौथो स्थानमा उक्लने मौका गुमाउँदा २२ खेलबाट २९ अंक जोडेर पाँचौं स्थानमा यथावत रहेको छ ।