काठमाडौं – राष्ट्रिय टोलीका स्ट्राइकर अन्जन विष्ट अभ्यास र ट्रायलका लागि आज स्पेन जाँदैछन् । उनले स्पेनको मार्बेला युनाइटेड एफसीमा रहेर अभ्यास गर्ने र मिले सम्म ट्रायल दिने बताएका छन् । मार्बेला त्यहि क्लब हो जसमा अन्जन र राष्ट्रिय टोलीका रक्षक अनन्त तामाङले गत बर्ष केही साता अभ्यास गर्नुका साथै केही मैत्रीपूर्ण खेल खेलेका थिए ।
गत बर्ष फागुनमा उनीहरुले मार्बेलाले नेदरल्यान्ड्स पुगेर मैत्रीपूर्ण खेल खेलेका थिए । सोही क्लबमा राष्ट्रिय टोलीका अर्का स्ट्राइकर बिमल पनि जानेछन् । विगतमा जस्तै अहिले पनि लुइस डी ब्रायजले उनीहरुको अभ्यासको व्यवस्था मिलाएका हुन् । स्पेन यात्रालाई लिएर अन्जनले भने ‘हामीले पहिला पनि त्यहाँ गएर अभ्यास गरिसकेका छौं । फेरी मौका मिलेको छ । त्यहाँको वातावरण र अभ्यास हाम्रो भन्दा धेरै स्तरीय छ । यसले मलाई र राष्ट्रिय टोलीलाई फाइनल पुग्ने विश्वास छ ।’ मार्बेला युनाइटेड युएस सकर एकेडेमीको शाखाको रुपमा स्पेनको मालागामा स्थापित क्लब हो । सुरुमा युएस सकरकै नाममा स्थापना गरिए पनि २०१४ मा मार्बेला युनाइटेड एफसी नाम राखिएको क्लबको बेभसाइटमा उल्लेख छ ।
नेपालले पछिल्लो डेढ बर्षमा फुटबलमा चारवटा उपाधि जितेको थियो । अन्जन र बिमल नेपालले प्राप्त गरेका सबै सफलता दिलाउने टोलीका सदस्य हुन् ।गत भदौमा काठमाडौंमा साफ यु–१९ उपाधि उचालेको नेपालले माघमा बंगलादेशमा बंगबन्धु गोल्डकप जितेको थियो भने यु–२३ टोलीले फागुनमा भारतमा १२ औं दक्षिण एसियाली खेलकुद (साग) अन्तर्गत फुटबलमा स्वर्ण पदक जितेको थियो । सबैभन्दा ठूलो सफलताका रुपमा अन्जन र बिमलसहितको टोलीले झन्डै दुई महिनाअघि मलेसियामा सोलिडारिटी कप जितेको थियो ।
