एजेन्सी – अन्तर्राष्ट्रिय मैत्रीपूर्ण खेलमा दक्षिण अमेरिकी राष्ट्र कोलम्वियाले युरोपेली राष्ट्र जर्मनीलाई पराजित गरेको छ । कोलम्वियाले घरेलु टोली जर्मनीमाथि २–० को सहज जित हात पारेको हो ।

कोलम्वियाको जितमा लुइस डियाज र जुआन कोर्डाडोले गोल गरे । भेल्टिन्स एरिना जर्मनीमा मंगलबार राति भएको प्रतिस्पर्धात्मक खेलमा दुवै गोल दोस्रो हाफमा भएको थियो ।

५४औं मिनेटमा लुइस डियाजले गोल गर्दै कोलम्वियालाई १–० को अग्रता दिलाए । उनले जुआन कोर्डाडोको पासमा गोल गर्न सफल भएका थिए ।

त्यसपछि ८१औं मिनेटमा कोर्डाडोले पेनाल्टीमा गोल गर्दै कोलम्वियाको जित पक्का गरे । डेइभेर मचाडोको क्रसलाई क्लियर गर्ने क्रममा योसुवा किम्मिखले ह्यान्ड गर्न पुगेपछि रेफ्रीले भिएआरको सहायतामा कोलम्वियालाई पेनाल्टी प्रदान गर्दा कोर्डाडो चुकेनन् ।

यस जितसँगै कोलम्विया पछिल्लो ११ खेलसम्म अपराजित रहन सफल भएको छ । २०२२ को फेब्रुअरीमा विश्वकप छनोटमा अर्जेन्टिनासँग १–० ले पराजित भएयता कोलम्विया ११ खेलसम्म अपराजित रहन सफल भएको हो । जसमा ९ जित र २ बराबरीको नतिजा छ ।

यता, जर्मनी भने पछिल्लो चार खेलसम्म जितविहीन बनेको छ । गत मार्चमा मैत्रीपुर्ण खेलमा पेरुलाई २–० ले पराजित गरेयता जर्मनीले चार खेल खेल्दा जित निकाल्न सकेको छैन । जसमा तीन हार र एक बराबरीको नतिजा छ ।