काठमाडौं (हाम्रो खेलकुद) – साफ च्याम्पियनसिप २०२३ अन्तर्गत समूह ‘बी’ को दोस्रो खेलमा माल्दिभ्सले भुटानलाई हराएको छ ।

भारतको बेंगलोरस्थित कन्तिरभा रंगशालामा बिहीबार भएको दोस्रो खेलमा माल्दिभ्सले भुटानलाई २–० ले हराएको छ । पूर्व विजेता माल्दिभ्सले भुटानविरुद्ध पहिलो हाफ र दोस्रो हाफमा समान १ गोल गरेको थियो । दिनको पहिलो खेलमा सोही समूहमा लेवनानले बंगलादेशलाई पनि २–० ले नै हराएको थियो ।

अन्तिम समयसम्म बराबरी गोल फर्काउन संघर्ष गरेपनि भुटानलाई सफलता मिलेन । भुटानको जितमा हाम्जा मोहम्मद र नाइज हसने गोल गरेका थिए । खेलको छैटौं मिनेटमा नै मोहमदको गोलबाट माल्दिभ्सले अग्रता लिएको थियो । भुटानले बराबरीका लागि पटक पटक गर्दा पनि सफलता प्राप्त गर्न सकेन भने नाइज सहजनले खेलको अन्तिम मिनेटमा गोल गर्दै टोलीको जित पक्का गरेका थिए । समूह बीमा माल्दिभ्स र लेवनानको समान ३ अंक भएको छ । भुटान र बंगलादेश भने अंक विहिन छन् ।

लेवनानलाई सफलता

आमन्त्रित टोलीको रुपमा पहिलो पटक साफ च्याम्पियनसिप खेल्न आएको लेवनानले दुवै गोल दोस्रो हाफमा गरेको थियो ।
लेवनानले ७९ औं मिनेटमा कप्तान हसन मातुकको गोलमा अग्रता लिएको थियो । दोस्रो हाफमा मैदान प्रवेश गरेका उनले टोलीलाई अघि बढाएका थिए ।

इन्ज्युरी समयको छैटौं मिनेटमा खलिल बादेरले गोल गर्दै लेवनानको जित पक्का गरे । काउन्टर अट्याकमा उनले सहजै गोल गरेका थिए । समूह ‘ए ‘मा बुधबार नेपाल अर्को आमन्त्रित टोली कुवेतसँग ३–१ ले पराजित हुँदा आयोजक भारतले पाकिस्तानलाई ४–० ले हराएको थियो ।