काठमाडौं (हाम्रो खेलकुद)– आयोजक भारत साफ च्याम्पियनसिपको फाइनलमा प्रवेश गरेको छ । लेवननलाई टाइब्रेकरमा ४–२ ले हराउँदै भारत उपाधि रक्षाको नजिक पुगेको छ । भारतले उपाधिका लागि मंगलबार कुवेतको सामना गर्नेछ । यसअघि बंगलादेशलाई १–० ले हराउँदै कुवेत फाइनलमा पुगेको थियो ।

बैंगलरुको कान्तिरभा रंगशालामा शनिबार निर्धारित समय र थप समय गोलरहित बराबरीमा टुंगिएपछि खेल टाइब्रकेरमा धकेलिएको थियो । पेनाल्टीमा भारतका सबै ४ खेलाडीले गोल गर्दा लेवननका दुई खेलाडी गोल गर्नबाट चुकेका थिए ।

लेवननका कप्तान हसन माटुकको पहिलो प्रहारलाई नै भारतीय गोलकिपर गुरप्रित सिंह सान्धुले रोकेका थिए । चौथो पेनाल्टीमा खलिल बदरको प्रहार आकाशिएको थियो । वालिद स्वर र मोहम्मद सादेक मात्र लेवननका लागि पेनाल्टीमा गोल गर्न सफल भए । भारतका लागि भने कप्तान सुनिल क्षेत्री, अनवर अली, महेश सिंह र उदान्त सिंहले गोल गरेका थिए । निर्धारित समय र थप समयमा दुबै टोलीले गोलका लागि अवसर पाएपनि सफलता भने प्राप्त गर्न सकेनन् ।

सन् १९९५ पछि पहिलो पटक टाइब्रेकरमा पुगेको सेमिफाइनलमा यसपटक पनि भारतनै सफल भएको थियो । त्यति बेला पनि बंगलादेशलाई ४–२ ले हराउँदै भारत फाइनल पुगेको थियो । भारत र कुवेतबीच मंगलबार फाइनल खेल हुने छ । समूह चरणमा भारत र कुवेत एकै समूहमा थिए । समूह चरणको अन्तिम खेल १–१ को बराबरीमा टुंगिएपछि कुवेत समूह विजेता र भारत उपविजेताका रुपमा सेमिफाइनल पुगेको थिए ।

समूह चरणमा भारत र कुवेत दुबैले नेपाल र पाकिस्तानलाई हराएका थिए । साफको १४ औं संस्करणमा आइपुग्दा भारत नवौं पटक उपाधि जित्ने प्रयासमा हुनेछ । दक्षिण एसिया बाहिरका कुवेत र लेबननले पहिलो पटक साफ च्याम्पियनसिपमा भाग लिएका हुन् । भारत सन् २००३ बाहेक सबै संस्करणको फाइनल खेल्दै आएको छ ।