काठमाडौं (हाम्रो खेलकुद)– पोखरामा अर्को साता सुरु हुने आहा रारा गोल्ड कप फुटबलमा भाग लिन नेपाली राष्ट्रिय टोलीका पूर्व खेलाडी प्रलय राजभण्डारीको कप्तानीमा युएसए नेपाल सकर टिम शनिबार साँझ नेपाल आइपुग्ने भएको छ । दुई दिनको बसाईंपछि टोली पोखरा जाने प्रलयले जानकारी दिए ।

टोलीमा १८ खेलाडी, दुई प्रशिक्षक कुमार शेरचन र सुरज थापा तथा व्यवस्थापकमा मेदिनी अधिकारी रहेका छन् । टोलीमा रहेका खेलाडी ३ विदेशी हुन् भने बाँकी नेपाली खेलाडी हुन् । नेपाली राष्ट्रिय टोलीका पूर्व खेलाडी उमेश प्रधानको नेतृत्वमा खेलाडी छनोट गरि सकर टिम तयार पारिएको थियो । शनिबार खेलाडी, प्रशिक्षक र व्यवस्थापक गरेर १७ जना आइपुग्ने र बाँकी कप्तान ६ खेलाडी दुई दिनपछि नेपाल आउने प्रलयले बताए ।

टोलीको अन्य खेलाडीमा रोशन घिमिरे, रोशन देवकोटा,तेनिस कटुवाल, उमेश पाण्डे, सौरन राउत, किरण लामा र एडम एग्रो छन् । त्यस्तै प्रतिक सिंह, विज्ञान श्रेष्ठ, निश्चल पण्डित, विवेक तामाङ, पारु हाङ लिम्बु, रविन सुब्बा, प्रदीप खड्गी, जोनाथन जोग्रेट र शीषिर विश्वकर्मा पनि टोलीका सदस्य हुन् ।

आहा रारा गोल्डकपको १५ औं संस्करण मंगलबार पोखरा रंगशालामा सुरु हँदैछ । आयोजक सहारा क्लबले गोल्डकपको तयारी अन्तिम चरणमा पुगेको बताएको छ । माघ १५ गते सम्म हुने प्रतियोगिताको खेल तालिका केही दिनमा सार्वजनिक हुने क्लबले जनाएको छ । आहा रारा गोल्डकप खेल्न अमेरिकाबाट कुनै पनि टोली आउन लागेको यो पहिलो पटक हो ।