धनगढी (हाम्रो खेलकुद) – लक्ष्मी हुन्डाई मनाङ मस्याङ्दी क्लब धनगढीमा जारी भागेश्वर गुप्र सुदुरपश्चिम खप्तड गोल्डकप फुटबल प्रतियोगिताको उपाधि नजिक पुगेको छ । धनगढी रंगशालामा बिहीबार भारतको दिल्ली युनाईटेडलाई ३–१ स्तब्ध हराउँदै मनाङ फाइनल पुगेको हो । मनाङलाई जित दिलाउन कप्तान अनिल गुरुङले २ र ओलावाले आफिजले १ गोल गरेका थिए ।
खेलमा अग्रता भने दिल्लीले लिएको थियो । दिल्लीका लागि थोपीले दोस्रो मिनेटमै गोल गरेका थिए । तर टोलीले अग्रतालाई ५ मिनेटपनि जोगाउन सकेन । ७ औं मिनेटमा मनाङका अनिलले बराबरी गोल फर्काए । पहिलो हाफमै मनाङले अर्को गोल गर्यो र २–१ को अग्रता बनायो । दोस्रो गोल आफिजले पहिलो हाफ हुन १ मिनेट बाँकी रहँदा गरेका थिए ।
आक्रमणलाई दोस्रो हाफमा पनि जारी राखेको मनाङका लागि अनिलले खेल सकिन १ मिनेट बाँकी रहँदा अर्को गोल गरे टोलीको जित निश्चित पारे । म्यान अफ दी म्याच बनेका अनिलले ५ हजार रुपैयाँ प्राप्त गरे । मनाङका प्रशिक्षक छिरिङ लोप्साङ गुरुङले राम्रो खेलेर नतिजा आफ्नो पक्षमा पारेको र अझै गोल गर्ने अवसरलाई पनि भने दिल्लीका गोलकिपर सन्जु थापाले सफल हुन नदिएकोब ताए । मनाङका कप्तान अनिलले उपाधि जित्ने विश्वास व्यक्त गर्दै सेमिफाइनलकै प्रदर्शनलाई दोहोरोउने प्रतिबद्धता गरे ।
दिल्लीका प्रशिक्षक क्लेवसन वारतेले आफुहरुले केही मौका गुमाएको र विपक्षीले स्तरीय खेलका कारण नतिजा निकाल्न नसकेको बताए । दिल्लीका कप्तान डन लोप्चाले प्रदर्शन सन्तोषजनक भएपनि अग्रता जोगाउन नसक्दा हार्नु परेको बताए ।
सुदूरपश्चिम ११ स्पोर्टस् क्लबको आयोजनामा जारी प्रतियोगिताको विजेताले ५ लाख र दोस्रो हुने टोलीले २ लाख ५१ हजार रुपैयाँ तथा उत्कृष्ट खेलाडीले मोटरसाइकल प्राप्त गर्नेछन् ।
खप्तड गोल्डकपमा शुक्रबारको सेमिफाइनल
सुदूरपश्चिमाञ्चल ११ विरुद्ध सिएमजी क्लब संकटा
