एजेन्सी – ब्राजिलियन फरवार्ड रिचार्लीसनले दोस्रो हाफमा गरेको ह्याट्रिकको सहयोगमा टोटेनहम हट्सपरले प्रि सिजनको मैत्रीपूर्ण खेलमा सिंगापुरको लायन सिटी सेलर्सलाई हराएको छ ।

सिंगापुरको राष्ट्रिय रंगशालामा भएको खेलमा टोटेनहमले ५-१ को जित निकालेको हो । खेलमा स्थानीय टोलीले अग्रता लिएपनि टोटेनहमले दोस्रो हाफमा ४ गोल गर्दै फराकिलो जित हासिल गरेको हो ।

खेलको १४ औं मिनेटमा सेलर्सका लागि अनुआरले अग्रता दिलाएका थिए । उनले स्थानीय टोलीको पहिलो आक्रमणलाई नै गोलमा परिणत गरेका थिए । पहिलो हाफको इन्ज्युरी समयमा टोटेनहमले बराबरीको अवसर पायो । ह्यारी केनले पेनाल्टीमा गोल गर्दै खेल १-१ को स्थितिमा ल्याए ।

दोस्रो हाफमा टोटेनहमले पहिलो रोजाइका सबै खेलाडी परिवर्तन गरेको थियो । दोस्रो हाफको सुरुवाती समयमा नै टोटेनहमले लगातार गोल गर्यो । घरेलु टोलीको डिफेन्सको गल्तीमा रिचार्लीसनले ४८ औं र ५१ औं मिनेटमा गोल गरे ।

७१ औं मिनेटमा अर्जेन्टिनी मिडफिल्डर जिओभानी लो सेल्सोले गोल गर्दै अग्रता फराकिलो पारे । इन्ज्युरी समयको पहिलो मिनेटमा रिचार्लीसनले गोल गर्दै ह्याट्रिक पूरा गरे ।

टोटेनहमको पछिल्लो मैत्रीपूर्ण खेल वर्षाका कारण रद्द भएको थियो । थाइल्याण्डमा लेस्टरविरुद्ध हुनुपर्ने खेल वर्षाका कारण मैदानमा पानी जमेपछि हुन सकेको थिएन । टोटेनहमले प्रि सिजनमा अब शाख्तर डोनेस्क र बार्सिलोनासँग खेल्नेछ ।