एजेन्सी – प्रि सिजनको मैत्रीपूर्ण खेलमा इंग्लिस क्लब आर्सनलले बार्सिलोनाको पोस्टमा गोलवर्षा गरेको छ । खेलमा अग्रता लिएपनि बार्सिलोना दोस्रो हाफमा कमजोर हुँदा ५-३ ले पराजित भएको हो ।

पहिलो हाफ २-२ को बराबरीमा सकिएपछि दोस्रो हाफका लागि बार्सिलोनाले सुरुवाती रोजाइका सबै खेलाडी परिवर्तन गरेको थियो । त्यसपछि आर्सनलले ३ गोल गर्दा बार्सिलोनाले १ गोल मात्र गर्न सक्यो ।

खेलको सातौं मिनेटमा पोलिस फरवार्ड रोबर्ट लेवान्डोस्कीले बार्सिलोनालाई अग्रता दिलाए । गोलरक्षक आरोन राम्सडेलले बचाउ गरेर फर्किएको बललाई लेवान्डोस्कीले गोलमा परिणत गरेका थिए ।

१३ औं मिनेटमा आर्सनल बुकायो साकाको गोलसँगै बराबरीमा फर्कियो । पेनाल्टी क्षेत्रभित्र डिफेन्सले गरेको गल्तीमा उनले वन भर्सेस वनको स्थितिबाट गोल गरेका थिए । तर त्यसपछि प्राप्त पेनाल्टीमा भने उनले गोल गर्न सकेनन् ।

३४ औं मिनेटमा ब्राजिलियन राफिन्हाले बार्सिलोनालाई अघि बढाए । उनको फ्रिकिक वालमा लाग्दा गोलरक्षक राम्सडेल झुक्किएपछि गोल भएको थियो ।

आर्सनलका लागि काइ हाभर्ट्जले पहिलो हाफको २ मिनेट बाँकी रहँदा गोल गर्दै खेल बराबरी गरे । उनले ६ यार्ड बक्स भित्रबाट बललाई पोस्टको दिशा दिएका थिए ।

लिआन्द्रो ट्रोसार्डके ५५ औं मिनेटमा आर्सनललाई अघि बढाए ।काउन्टर अट्याकमा उनले पेनाल्टी क्षेत्र भित्रबाट गरेको प्रहारमा गोलरक्षक इनाकी पेना बिट भएका थिए ।

ट्रोसार्डले ७८ औं मिनेटमा अग्रता दोब्बर पारे । किएरन टिएर्नीको क्रसमा पहिलो टचमा फिनिस गर्दै उनले आर्सनललाई ४-२ ले अघि बढाए ।

८८ औं मिनेटमा बार्सिलोनाका फेरान टोरेसले गोल गरेपनि त्यसको एक मिनेट पछि नै फाबिओ भिएराले आर्सनलका लागि अर्को गोल थपे । उनले पेनाल्टी क्षेत्र बाहिरबाट सुन्दर गोल गरे ।

बार्सिलोनाले अब प्रि सिजनमा रियल म्याड्रिडसँग जुलाई ३०, एसी मिलानसँग जुलाई २ र टोटेनहमसँग अगस्ट ८ मा खेल्नेछ ।

आर्सनलले भने अगस्ट २ मा मोनाकोसँग खेलेपछि अगस्ट ६ मा कम्युनिटी सिल्डका लागि म्यानचेस्टर सिटीसँग प्रतिस्पर्धा गर्नेछ ।