वेलिङटन – उपाधि दावेदार स्पेनमाथि सानदार जित निकाल्दै एसियाली राष्ट्र जापान समूह विजेता बन्दै फिफा महिला विश्वकप फुटबलको प्रि–क्वाटरफाइनलमा प्रवेश गरेको छ ।

स्पेनमाथि ४–० को सानदार जित निकाल्दै जापान समूह ‘सी’ को विजेता बन्दै अन्तिम १६ मा पुग्न सफल भएको हो । हारका बावजुत स्पेन पनि समूहको उपविजेता बनेर नकआउट चरणमा प्रवेश गरेको हो ।

न्युजिल्यान्डस्थित वेलिङ्टन रिजनल स्टेडियममा सोमबार भएको खेलमा स्पेनले ७७ प्रतिशत बल पोसेसन राखेपनि लगातार गोल खाईरह्यो । जापानको फराकिलो जितमा हिनाता मियाजावाले दुई तथा रिको युकी र मीना तानाकाले समान एक गोल गरिन् । पहिलो हाफमा तीन गोल गरेको जापानले दोस्रो हाफमा एक गोल थपेको थियो ।

खेलको १२औं मिनेटमा हिनाता मियाजावाले गोल गर्दै जापानलाई सुरुवाती अग्रता दिलाइन् । उनले जुन इन्डोको पासमा गोल गर्न सफल भएकी थिइन् । २९औं मिनेटमा रिकोले गोल गर्दै जापानको अग्रता दोब्बर पारिन् । उनले मियााजावाको पासमा गोल गर्न सफल भइन् ।

४०औं मिनेटमा हिनाताले व्यक्तिगत दोस्रो तथा टोलीका लागि तेस्रो गोल गरेपछि जापन पहिलो हाफमै ३–० को आरामदायी स्थितिमा पुग्यो । सुरुको तीनै गोल नै काउन्टर अट्याकमा थियो ।

८२औं मिनेटमा मीना तानाकाले गोल गर्दै जापानलाई सानदार जित दिलाइन् । उनले मियावी मोरियाको पासमा गोल गर्न सफल भइन् ।

यस जितले अपराजित रहेको जापानले तीन खेलबाट ९ अंक बटुल्यो । जापानसँग पराजित स्पेन ६ अंक जोडेर दोस्रो स्थानमा रह्यो । यो समूहमा जाम्वियाले ३ तथा कोस्टा रिका अंकविहीन बनेर बाहिरियो ।

अब जापानले प्रि–क्वाटरफाइनलमा समूह ‘बी’ को उपविजेता नर्वेसँग तथा स्पेनले समूह ‘ए’ को विजेता स्वीट्जरल्यान्डसँग खेल्नेछ ।

सोमबार नै ह्यामिल्टनमा भएको यही समूहको अर्काे खेलमा जाम्वियाले कोस्टा रिकालाई ३–१ ले पराजित गर्दै समूहमा सान्त्वना जित निकालेको छ । जाम्वियाको जितमा लुसोमो मेम्वा, बारब्रा बन्डा र रचेल कुन्दानान्जीले गोल गरिन् ।