एजेन्सी – क्याटलान क्लब बार्सिलोनाले प्रि सिजनको मैत्रीपूर्ण खेलमा इटालियन क्लब एसी मिलानलाई पराजित गरेको छ ।

विंगर अन्सु फातीले दोस्रो हाफमा गरेको एकमात्र गोलको सहयोगमा बार्सिलोनाले मिलानलाई पराजित गरेको हो । उनले खेलको ५५ औं मिनेटमा गोल गर्दै टोलीलाई जिततर्फ अघि बढाएका थिए ।

फातीले पेनाल्टी क्षेत्र भित्रबाट दर्शनीय गोल गरेका थिए । उनले दायाँ भागमा डिफेन्डरलाई बिट गर्दै फार पोस्टमा गरेको प्रहार गोलमा परिणत भएको थियो । त्यसअघि बार्सिलोनाको पटक पटकको प्रयासमा गोलरक्षक माइक माइगनानले बचाएका थिए ।

बार्सिलोनाले यसअघि प्रि सिजनको खेलमा रियल म्याड्रिडलाई ३-० ले पराजित गरेको थियो । त्यसअघि आर्सनलसँग ५-३ को हार बेहोरेको बार्सिलोनाले भिसेल कोबेलाई २-० ले हराएको थियो । बार्सिलोनाले अब अगस्ट ८ मा जोआन गाम्पर ट्रफीका लागि टोटेनहमसँग खेल्नेछ । त्यसपछि लिगको पहिलो खेल अगस्ट १४ मा गेटाफेसँग हुनेछ ।

यता एसी मिलान यसअघि युभेन्टससँग २-२ को बराबरीपछि टाइब्रेकरमा हारेको थियो । त्यसअघि इटालियन क्लबले रियल म्याड्रिडसँग ३-२ को हार बेहोरेको थियो । मिलानले अब अगस्ट ९ मा ट्रेन्टो र अगस्ट १३ मा नोभारासँग खेल्नेछ । लिगको पहिलो खेल अगस्ट २२ मा बोलोग्नासँग रहेको छ ।