सिड्नी – उपाधि दावेदार इंग्ल्यान्ड फिफा महिला विश्वकप फुटबल २०२३ को सेमिफाइनलमा प्रवेश गरेको छ । कोलम्बियामाथि २–१ को पूनरागमन जित निकाल्दै इंग्ल्यान्डले अन्तिम चारमा स्थान पक्का गरेको हो ।

इंग्ल्यान्डको जितमा लौरेन हेम्प र एलेसिया रुसोले गोल गरिन् । कोलम्वियाकी लेसी सान्तोषको गोल सान्त्वना बन्यो । स्टेडियम अष्ट्रेलिया सिड्नीमा शनिबार भएको खेलमा इंग्ल्यान्डले बल पोसेसन राख्दै दवाव बढाएपनि गोल खान पुगेको थियो ।

४४औं मिनेटमा लिसी सान्तोषले गोल गर्दै यो सिजन लयमा रहेको कोलम्वियालाई १–० को अग्रता दिलाइन् । उनले लिन्डा काइसेडोको पासमा गोल गर्न सफल भएकी थिइन् । तर, कोलम्वियाको त्यो अग्रता लामो समय टिकेन ।

पहिलो हाफको इन्ज्युरी समयको थप गरिएको सातौं मिनेटमा लौरेन हेम्पले गोल गर्दै खेललाई १–१ गोलको बराबरीमा ल्याइन् । ६३औं मिनेटमा एलेसिया रुसोले गोल गर्दै इंग्ल्यान्डलाई खेलमा २–१ को अग्रता दिलाइन् । त्यसपछि थप गोल निस्कन नसक्दा इंग्ल्यान्ड २–१ ले विजयी हुन सफल भयो ।

इंग्ल्यान्डको जितसँगै अष्ट्रेलिया र न्युजिल्यान्डमा जारी फिफा महिला विश्वकपको सेमिफाइनल समिकरण पूरा भएको छ । अब इंग्ल्यान्डले सेमिफाइनलमा सह–आयोजक अष्ट्रेलियासँग खेल्नेछ ।

अर्काे सेमिफाइनलमा स्पेन र स्वीडेनबीच खेल हुनेछ । पहिलो सेमिफाइनल १५ अगस्टमा हुनेछ । १६ अग्रस्टमा दोस्रो सेमिफाइनल हुनेछ ।

शनिबारै सह–आयोजक अष्ट्रेलियाले फ्रान्सलाई सडनडेथमा ७–६ ले पराजित गर्दै पहिलोपल्ट सेमिफाइनलमा स्थान बनाएको छ । निर्धारित र थप गरिएको अतिरिक्त समयमा कुनै गोल निस्कन नसकेपछि खेल टाइब्रेकरमा लम्बिएको थियो ।

अष्ट्रेलिया विश्वकपको इतिहासमा पहिलोपल्ट सेमिफाइनलमा प्रवेश गरेको हो । त्यसअघि अष्ट्रेलिया क्वाटरफाइनलभन्दा अघि बढ्न सकेको थिएन । अष्ट्रेलिया सन् २००७, २०११ र २०१५ मा क्वाटरफाइनलबाट बाहिरिदा २०१९ मा भने प्रि–क्वाटरफाइनलबाट बाहिरिएको थियो ।

ब्रिसवेन स्टेडियम टाइब्रेकरमा घरेलु टोली अष्ट्रेलियाकी केइटलिन फुर्ड, सामान्थ खेर र मारी फोलेरले गोल गर्न सफल हुँदा स्टेफ क्याट्ले र म्याकेन्जी अर्नाेल्डले गोल गर्न सकिनन् । सडन डेथमा कटरिना गोरी, तमेका यालोप, एली कार्पेन्टर र कोर्टनी भिनले गोल गर्दा क्लेर हन्टले गोल गर्न सकिनन् ।

फ्रान्सकी सेल्मा बाचाले पहिलो पेनाल्टी चुकाउँदा कडिडियाटोउ, डिएनी, वेन्डी रेनार्ड र इगुइनी ले सोमेरले गोल गर्न सफल भइन् । इभ पेरिसेटले गोल गनए सकिनन् । सडन डेथमा ग्रेस जियोरो, सकिना कारचाओइ, मायर लाकररले गोल गर्न सफ हुँदा केन्जा डाली र भिकी बेचोले गोल गर्न सकिनन् ।