एजेन्सी – पोर्चुगिज फरवार्ड क्रिस्टियानो रोनाल्डो कप्तान रहेको साउदी क्लब अल नासरले एसियाली च्याम्पियन्स लिगको छनोट चरण अन्तर्गत प्लेअफमा आज शबाब अल अहलीको सामना गर्दैछ ।

नेपाली समयअनुसार रातको ११ बजे हुने खेलमा जित हासिल गरे अल नासरले यो वर्षको च्याम्पियन्स लिगमा प्रतिस्पर्धा गर्नेछ । यस खेलमा पराजित हुने टोलीले एसियाली क्लब फुटबलको दोस्रो श्रेणी एएफसी कप खेल्न पर्ने हुन्छ ।

संयुक्त अरब इमिरेट्सको शबाब अल अहलीले प्लेअफको पहिलो चरणमा जोर्डनको अल वेह्दातलाई पराजित गरेको थियो । अल नासर भने सिधै प्लेअफको अन्तिम चरणमा प्रतिस्पर्धा गर्दैछ ।

सिजनको सुरुवातमा अरब क्लब च्याम्पियन्स कप जितेको अल नासरले घरेलु लिगमा भने बिर्सनलायक सुरुवात गरेको छ । युरोपेली क्लबबाट नाम चलेका खेलाडी अनुबन्ध गरेपनि क्लबले अल इतिफक र अल ताउनसँग लगातार हार बेहोरेको छ ।

अल नासरमा कप्तान रोनाल्डोपछि साडियो माने, मार्सेलो ब्रोजोभिच, सेको फोफाना र एलेक्स टेलेस यसै ट्रान्सफर विन्डोमा भित्रिएका हुन् । ब्राजिलियन फरवार्ड टालिस्काले पनि राम्रो प्रदर्शन गरिरहेका छन् । म्यानचेस्टर सिटीका डिफेन्डर एमेरिक लापोर्टपनि अल नासर आउने चर्चा छ ।

साउदीबाट अल इतिहाद, अल फायहा र अल हिलाल च्याम्पियन्स लिगका लागि छनोट भइसकेका छन् । भारतको मुम्बई सिटी फुटबल क्लबले पनि समूह चरणमा स्थान पक्का गरिसकेको छ । अब प्लेअफबाट ८ टोलीको टुंगो लागेसँगै अगस्ट २४ मा समूह चरण ड्र हुनेछ ।

यो पनि : साउदी लिगका स्टार भारत आउने सम्भावना