एजेन्सी – इंग्लिस प्रिमियर लिग अन्तर्गत गएराति सम्पन्न तेस्रो चरणको पहिलो खेलमा चेल्सीले लुटन टाउनलाई पराजित गरेको छ ।

रहीम स्टर्लिङ को दुई गोल र निकोलस ज्याक्सनको पहिलो गोलको मद्दतले चेल्सीले ३-० को जीत हासिल गरेको हो । यसअघि सुरुवाती दुई खेलमा जित निकाल्न नसकेको चेल्सीले मौरिसियो पोचेटिनोको आगमनपछि पहिलो जित दर्ता गर्यो ।

खेलको १७औ मिनेटमा स्टर्लिङ्गको उत्कृष्ट एकल गोलमार्फत चेल्सीले खेलमा अग्रता लिएको थियो । उनले बक्स बाहिरबाट बल नियन्त्रणमा लिएर लुटन टाउनका डिफेन्डरहरुलाई चकित पार्दै बललाई जाली चुमाएका थिए ।

६८औं मिनेटमा स्टर्लिङ्गले नै व्यक्तिगत दोस्रो गोल गर्दै अग्रता दोब्बर पारे । मालो गुस्टोको पासमा बललाई गोल पोस्टको दिशा देखाउँदै स्टर्लिङ्गले दोस्रो गोल गरेका थिए । स्टर्लिङ्गको दुवै गोलमा गुस्टोकै असिस्ट रहेको थियो ।

तेस्रो गोलमा पनि स्टर्लिङ्ग संलग्न रहे । ७५औं मिनेटमा निकोलस ज्याक्सनले उनकै पासमा गोल गर्दै खेलमा चेल्सीलाई ३-० को अग्रता दिलाएका थिए ।

दुवै टिमले खेलमा गोल गर्ने अरु अवसरहरु खेर फाले । खेलको १५औ मिनेटमा चेल्सीका एन्जो फर्नान्डेजको सट क्रसबारको केहि माथि बाट बाहिरियो । ३५औं मिनेटमा लुटन टाउनका नाकाम्बाले स्टर्लिङ्गलाई रोक्दै काउन्टर अट्याक रोक्न सफल भए । लुटनले पहिलो हाफमा गोल गर्ने अर्थपूर्ण अवसरहरु सिर्जना गर्न सकेन ।

दोस्रो हाफमा पनि चेल्सी कै पकड बनिरह्यो । ५०औं मिनेटमा गोल गर्ने अवसर आफुसंग हुदा हुदै ज्यक्संले स्टर्लिङ्गलाई पास गर्न खोजेपछि चेल्सी गोल गर्न बाट चुक्यो । त्यसको एक मिनेट पछाडी ज्याक्सनको भलि लुटन गोलरक्षक कामिन्सकीले बचाव गर्दै विफल पारे ।

५६औं मिनेटमा एन्जो फर्नान्डेजले लिएको सट गोलपोस्टमा लागेर बाहिर गयो । ६२औं मिनेटमा पुगेपछि बल्ल लुटनले राम्रो अवसर सिर्जना गर्यो । जाइल्सले चोङ्गको पासमा लिएको सट चेल्सीका गोलकिपर सान्चेजले विफल पारे । त्यसबाहेक लुटनले खेलमा गोल गर्ने राम्रो अवसरहरु बनाउन सकेन ।

यो चेल्सीको यस सिजनको पहिलो जित हो । चेल्सीले गत दुई खेलमा एकमा हार र एक खेलमा बराबरी गरेको थियो । यस जित संगै चेल्सीको चार अंक पुगेको छ। लुटनको भने दुई खेलमा कुनै पनि अंक रहेको छैन ।

इंग्लिस प्रिमियर लिगमा शनिबार तेस्रो चरणकै थप ६ खेल हुँदैछन् ।