काठमाडौं (हाम्रो खेलकुद) – इजरायली शीर्ष डिभीजन लिगाट नसिमको नयाँ सिजनको दोस्रो खेलमा सावित्रा ‘साम्बा’ भण्डारीको टोली हापोएल रानानाले १–१ गोलको बराबरी खेलेको छ । रानानाले हापोएल पेटा टिक्भा एफसीसँग बराबरी खेलेको हो ।

रानानाको लागि साम्बाले खेलको ६० औं मिनेटमा गोल गर्दै अग्रता दिलाएकी थिइन् । उनको यो लिग सिजनको व्यक्तिगत पाचौं गोल हो । निकै प्रतिस्पर्धात्मक खेलमा रानाना अधिकांश समय दवावमा रहेको थियो ।

साम्बाको गोलमा अग्रता लिएपनि पेटाले लि फाल्कनको गोलमा ५ मिनेटपछि नै खेल बराबर गर्यो । ८१ अ‍ौं मिनेटमा पेटाले अग्रता लिने अवसर पनि पायो । तर रानानाकी अमेरिकी गोलरक्षक काम्री सेसिलले पेनाल्टी बचाउँदै खेल बराबरीमा राखिन् ।

दुई खेलमा पाँच गोल गर्ने क्रममा उनले पहिलो खेलमा मात्रै चार गोल गरेकी थिइन् । त्यो खेलमा रानानाले रमाट हशारोनमाथि ४-० को जित निकालेको थियो ।

रानानाको २ खेलमा ४ अंक रहेको छ । पेटमा ३ खेलमा ७ अंकका साथ शीर्षस्थानमा छ ।

लिग खेलेसँगै साम्बा युरोपेली लिग खेल्ने पहिलो नेपाली फुटबल खेलाडी बनेकी समेत थिइन् । करिब एक महिना अगाडि इजरायल पुगेकी साम्बाले यस अघि रानानाका लागि अथिना कपमा खेलहरु खेलिसकेको थिइन् । त्यस प्रतियोगितामा रानाना डिफेन्डिङ च्याम्पियन किर्याट गिलसँग हार बेहोर्दै सेमिफाइनलबाट बाहिरिएका थियो ।

गत सिजन भारतीय महिला लिगमा कीर्तिमानी प्रदर्शन गरेपछि साम्बालाई इजरायली लिगमा खेल्ने मौका मिलेको हो । साम्बा अब एसियाली खेलकुदको तयारीमा जोडिन नेपाल आउनेछिन् ।